ТМД Экономикалық Кеңесінің комиссиясы Мәскеуде Достастық елдерінің тұрақты көрмесін құруды қарады

АСТАНА. 13 қараша. ҚазАқпарат - ТМД Экономикалық Кеңесі жанындағы экономикалық мәселелер жөніндегі комиссиясы Мәскеуде Бүкілресейлік көрме орталығында Достастық мемлекеттерінің тұрақты жұмыс істейтін көрмесін құру туралы шешімдердің орындалу барысын қарады, деп хабарлады БЕЛТА.

Бүгін Ресей астанасында Беларусьтің тұрақты өкілі, Беларусьтің Ресейдегі елшісі Игорь Петришенконың төрағалығымен оның отырысы өтті.

Сондай-ақ ТМД-да халықаралық автомобиль жолдарын жобалауда, салуда және пайдалануда қоршаған ортаны қорғау талаптарын сақтау, ТМД мемлекеттерінің аймақаралық және шекара маңы ынтымақтастығы туралы қол қойылған халықаралық құжаттар тізіліміне өзгерістер енгізу, Достастық елдерінің орман өнеркәсібі кешендері мен орман шаруашылығының әлеуметтік-экономикалық дамуы, 2014-2015 жылдардағы ТМД жарғылық органдарының отырыстарында ТМД ынтымақтастық органдарының қызметі туралы есеп беру кестесі мәселелері қаралды. Сондай-ақ бірқатар бюджет-қаржы мәселелері талқыланды.

Отырысқа комиссиядағы Достастық мемлекеттерінің өкілетті өкілдері, сондай-ақ ТМД Атқару Комитетінің, ТМД-ның бірқатар мемлекетаралық және үкіметаралық органдарының және Достастық мемлекеттері басқару органдарының өкілдері қатысты. ,