Токиода Данилина мен Құламбаева әлемдегі мықты жұптардың бірін ұтты
ТОКИО. KAZINFORM - Токио қаласында Билли Джин Кинг кубогінің Қазақстан мен Жапония арасындағы іріктеу матчы мәресіне жетті.
Кортта жұптық сында Анна Данилина - Жібек Құламбаева әлемнің 20-ракеткалары Сюко Аояма - Эна Сибахарамен сынға түсті.
Бірінші партияда қазақстандық жұп тай-брейкте басымдылық танытты - 7:6 (9:7).
Екіншісінде жапониялықтар есе қайырды - 6:3.
Супер тай-брейкте Құламбаева - Данилина жеңіст жұлып алды - 11:9.
Екі сағатқа жуық уақытқа созылған тартысты бәсекеде қазақстандықтар 2 эйспен бірге 8 брейк-пойнттың үшеуін пайдаланды. Жапониялық дуэт 3 эйс, 5 брейкпен (8 брейк-пойнт) көзге түсті.
Осылайша, қорытынды есеп - 3:1, Жапония құрамасы финалдық кезеңге жолдама алды.
Қазақстан командасы қараша айында Билли Джин Кинг кубогінің плей-офф кезеңінде бақ сынайды.
Еске сала кетейік, бұдан бұрын Билли Джин Кинг кубогінде Жапонияның алғаш рет финалдық кезеңге шыққанын жазған болатынбыз.
