Тоқтар Төлешовтің ұлы: «Бұны да көрерміз...»
"Бəрі жақсы. Құпия мәліметтерді жарияламау туралы қаулы бар... Сондықтан, əңгімемізді осы жерден тоқтатсақ дұрыс болады", - деді ҚазАқпарат тілшісінің сұрағына жауап берген Төлеген Төлешов.
"Бəрі жақсы... Басым аман. Бұны да көрерміз...", - деді ол əкесіне кесілген 21 жыл туралы қойған сұраққа жауап бере отырып.
Ал, отбасыңыз 21 жыл туралы ақпаратты қалай қабылдады деген сұраққа Төлеген: "үйдегі жағдайдың қандай екенін мен əлі білмеймін, бірақ, сіздер, журналистер біліп отырған шығар. Əңгімені осымен тоқтатайық", деді.
Естеріңізге сала кетейік, бүгін Астана қалалық қылмыстық істер жөніндегі ауданаралық мамандандырылған əскери сотының судьясы Ербол Ахметжанов ТоқтарТөлешовті ҚР Қылмыстық кодексінің 265-бабы, 3-тармағы бойынша 11 жылға; 266-бабы, 3-тармағы бойынша мүлкін тəркілеумен қатар 10 жыл бойы коммерциялық мекемелерде басшылық қызметін атқару құқығынан айыра отырып, 10 жылға; 179-бап, 3-тармағына сəйкес 15 жылға; 182-бабы, 3-бабына сəйкес мүлкін тəркілеумен қатар бес жыл бойы коммерциялық жəне жауапты ұйымдарда бес жылға дейін басшылық қызметін атқару құқығынан айыра отырып, 15 жылға; 367-бабы, 2-тармағына сəйкес мүлкін тəркілеумен қатар 3 жылға бас бостандығынан айырып; Қылмыстық кодекстің 296-бабына сəйкес мемлекет пайдасына 200 айлық есептік көрсеткіш көлемінде түзету жұмыстарына жегу; 387-бабы, 1-тармағына сəйкес, мемлекетке 200 айлық есептік көрсеткіш көлемінде ақша қайтаруға міндеттеп, қылмыстық кодекстің 58-бабы 4-тармағына сəйкес, жоғарыдағы баптарды қоса отырып, Тоқтар Төлешовті мүлкін тəркілей отырып 21 жылға бас бостандығынан айыру туралы үкім шығарды.
Ал, оның ұлы Төлеген Төлешовті судья бес жылға шартты түрде бас бостандығынан айырып, сот залынан босатты.