Топар кентінде үш адамға түйнеме жұққаны расталды

Қарағанды облысының Топар кентінде үш адамнан түйнеме (сібір жарасы) анықталды, деп хабарлайды Kazinform.

Белгілі болғандай, бір үйдің қожайыны ауырып тұрған 8 айлық бұқаны союға мәжбүр болған. Олар сойылған малдың етін сатуды жоспарламаған. Сол үйдегі үш адамнан сібір жарасы анықталды, тағы екі адам дәрігерлердің бақылауында. Сондай-ақ, олармен байланыста болған 30 адам анықталып, олармен профилактикалық іс-шаралар туралы түсіндірме әңгіме жүргізіліп, медициналық бақылау орнатылды.

“Сойылған малдың еті тәркіленіп, мөрленіп, ветеринариялық заңнамаға сәйкес жойылатын болады. Кентте індетті оқшаулау және жою үшін барлық қажетті санитарлық-ветеринарлық эпизоотияға және эпидемияға қарсы іс-шаралар жүргізілуде. Барлық тексерілген ошақтарда дезинфекция жүргізілді, ветеринария мамандары үйлерді аралап, малдарды клиникалық тексеру және термометриядан өткізіп, егу жұмыстарын жүргізуде. Ауыл шаруашылығы министрлігі Ветеринариялық бақылау және қадағалау комитеті арқылы ветеринариялық препараттардың республикалық қорынан вакциналар мен дезинфекциялық құралдар толық қамтамасыз етілді”, - деп мәлімдеді Қарағанды облысы әкімдігінде.

Еске салсақ, Топар кентіне Абай қаласынан кіре берісте көліктерді санитарлық өңдеуден өткізу үшін бекет орнатылды. Карантиндік шараларды сақтау үшін Жартас кентінен Топар кентіне екінші кіреберіс уақытша жабылды. Тұрғындардың қозғалысына шектеу қойылған жоқ. Сондай-ақ, кенттен малды шығарып кіргізуге, оны өткізуге, ауру малдың сүтін пайдалануға, мал союға және аумақтан жем мен жемшөп қоспаларын шығаруға тыйым салынды.

“Жағдай уәкілетті қызметтердің толық бақылауында. Оқиға орнында санитарлық-эпидемиологиялық бақылау, денсаулық сақтау, ветеринариялық бақылау комитетінің аумақтық инспекциясы мен ветеринария басқармасының, республикалық эпизоотияға қарсы топтың бір топ қызметкерлері жұмыс істеуде”, - деді әкімдіктен.