Төртінші мұнай өңдеу зауытының құрылысы неге 2030 жылға шегерілді

АСТАНА. KAZINFORM — Мәжілісте өтіп жатқан Үкімет сағатында Энергетика министрі Алмасадам Сәтқалиев төртінші мұнай өңдеу зауытының құрылысын неге 2030 жылға шегергенін түсіндірді.

Мәжіліс депутаты Самат Мұсабаев министрге неліктен төртінші мұнай өңдеу зауытын салу жобасы жыл сайын кейін шегеріліп жатқанын сұрады.

«Төртінші мұнай өңдеу зауытын 2027 жылы бастап 2030 жылы аяқтауға болмай ма?», — деп сұрады депутат.

Алмасадам Сәтқалиевтің сөзінше, бұл Үкіметтің ұзақ мерзімді жоспарына байланысты.

«Қазір біздегі мұнай өңдеу зауыттарының жылдық қуаты — 18 млн тонна. Біз осы қуатты 26 млн тоннаға дейін жеткізуді жоспарлап отырмыз. Мұның бәрі 2030 жылға дейін деп межеленген. Нақты жоспар, келісім, қаражат бар. Яғни, орындауға толық мүмкіндік қарастырылған. Бұл бағдарлама мұнай өнімдерінің қажеттілігін толық жауып қана қоймай, экспорт әлеуетін туындатады», — деді ол.

Ведомство басшысы 2030 жылға қарай елде электр тоғымен жүретін көліктердің үлесі артуы мүмкін екенін айтты. Яғни, мұнайдан өңделетін жанармайға сұраныс азаюы да мүмкін.

«Төртінші мұнай өңдеу зауыты туралы айтсақ, неге 2030 жылдан кейін деп отырмыз? Өйткені 2030 жылға дейін бүкіл қажеттілік тұтас жабылады. Жаңа зауытты салу шешімі осы жұмыстардың қорытындысы бойынша жасалатын техникалық-экономикалық негіздеме арқылы қабылданады. Яғни, 2030 жылға қарай мұнай өңдеу қуатымыз қанша көлемде болатынын түсінуіміз керек. Шынын айтқанда елімізде электрмен жүретін көлік саны қалай өзгеретіні әзірге түсініксіз. Бұл зауытты жанармай өндірісіне бағыттаймыз ба, әлде, мұнай-газ-химия жағына басымдық береміз бе? Осының бәрі салмақты зерттеуді қажет етеді. 2030 жылға қарай, үш жылдың ішінде осы саясат түсінікті болады», — деді Алмасадам Сәтқалиев.

Сондай-ақ, ол 2030 жылға қарай Қазақстанда мұнай өндіретін алпауыт инвесторлардың өнімді бөлісу келісімшартын қайта қарайтын кезең жақындайтыны еске салды.

«Бұл кезеңде келіссөздерді бастаймыз, өнімді бөлісу келісімдерінің уақыты да аяқталатын уақыт та жақындайды. Осы ресурстарды да пайдалана аламыз. Үкіметтің бұл мәселе бойынша көздегені бар. Зауыт құрылысының мерзімі бар. Жобалау аяқталғаннан бастап 36 айдың ішінде салынып біту керек. Яғни, 2030 жылдан 2040 жылға дейін деген көкжиек белгілеп отырмыз. Бұл зауытты 10 жыл бойы саламыз деген сөз емес. Осы 10 жылдың ішінде бізге жаңа зауыт керек деген сөз», — деді министр.

Бұған дейін хабарлағанымыздай, Парламент Мәжілісіндегі Үкімет сағатында депутат Бақтықожа Ізмұхамбетов жаңа мұнай кен орындарын барлауға тым аз қаражат бағытталып жатқанын айтты.