Трамп АҚШ пен Қытай арасындағы келіссөздерде «үлкен ілгерілеу» болғанын мәлімдеді

АСТАНА. KAZINFORM – Швейцарияда өткен келіссөздер барысында АҚШ пен Қытай «толық қайта жүктеу» жөнінде келісті, деп мәлімдеді АҚШ президенті Дональд Трамп. Ол кеңесулердің алғашқы күнін «өте жақсы» деп атады, деп хабарлайды BBC агенттігі.

— Көп нәрсені талқыладық, көптеген мәселелер бойынша келісімге келдік. Үлкен ілгерілеушілікке қол жеткіздік, — деп жазды Трамп өзінің Truth Social әлеуметтік желісінде, алайда нақты не туралы екенін нақтыламады.

АҚШ пен Қытай делегациялары бұл демалыс күндері Женевада екі күндік келіссөздер өткізіп жатыр. Мақсаты — Трамп сәуір айының басында бастаған сауда соғысын жеңілдету. Оның бастамасымен АҚШ Қытай тауарларына салынатын кедендік тарифтерді күрт көтерген еді. Бұған жауап ретінде Пекин де тарифтерді арттырды. Нәтижесінде салық мөлшері 100%-дан асып, екі ел арасындағы сауда іс жүзінде тоқтап қалған.

Reuters агенттігінің хабарлауынша, сенбі күні өткен делегациялар кездесуі сегіз сағатқа созылып, жексенбі күні таңертең жалғасады. Бұл — сауда соғысы басталғалы бері қос елдің жоғары лауазымды өкілдерінің алғашқы бетпе-бет кездесуі.

Бұған дейін Трамп Ақ үйдің «Розалар бағы» алаңында мәлімдеме жасап, АҚШ-тың жаңа тарифтік саясатын жариялаған еді.

Ол алдымен Қытайға салынатын тарифтерді 125%-ға, кейін 145%-ға дейін көтерді. Өз кезегінде Қытай АҚШ тауарларына тарифті 125%-ға дейін арттырды.

Бұған дейін хабарланғандай, Қытай тауарларын АҚШ баж салығын айналып өту үшін Оңтүстік Корея өнімі ретінде көрсетіп жатыр.