Трамп канадалық болат пен алюминийге баж салығын 50%-ға дейін көтереді

АСТАНА. KAZINFORM — АҚШ президенті Дональд Трамп Сауда министріне Канададан импортталатын болат пен алюминийге 50 пайызға дейін қосымша баж салығын енгізуді тапсырғанын жариялады, деп хабарлайды Euronews. 

Сейсенбіде АҚШ президенті Дональд Трамп канадалық болат пен алюминийге жоспарланған тарифтерді екі еселеп, оларды 50%-ға дейін көтеру жоспарын жариялады.

Truth Social әлеуметтік желісіндегі жазбасында ол тарифтер сәрсенбі, 12 наурызда күшіне енетінін жазды. Оның айтуынша, бұл Канаданың электр энергиясына орнатқан 25 пайыздық тарифіне жауап.

— Мен Сауда министріме әлемдегі ең жоғары тарифтік елдердің бірі Канададан Құрама Штаттарға келетін барлық болат пен алюминийге 50%-ға дейін ҚОСЫМША 25% баж салығын енгізуді тапсырдым, — деп жазды Трамп.

Ол сондай-ақ Канада билігінен америкалық сүт өнімдеріне баж салығын дереу төмендетуді талап етті.

— Егер Канада басқа да сорақы және бұрыннан келе жатқан тарифтерді жоймаса, 2 сәуірде мен АҚШ-қа әкелінетін автомобильдерге тарифтерді айтарлықтай көтеремін, бұл канадалық автокөлік өндірісін түбегейлі тоқтатады, — деп қорқытты Трамп.

Кейінірек АҚШ президентінің сауда жөніндегі кеңесшісі Питер Наварро канадалық болат пен алюминий импортына жоспарланған тарифтерді 50 пайызға дейін көтеру осы аптада күшіне енбейтінін мәлімдеді, деп жазды Интерфакс. 

— Дұрыс, — деп жауап берді ол CNBC News тілшісінің Канадаға тарифтерді көтеру кешіктіріліп жатқаны туралы сауалына.

Онтарио провинциясының премьер-министрі Даг Форд АҚШ Сауда министрімен сөйлескеннен кейін АҚШ-қа электр энергиясын экспорттауға 25% қосымша ақы енгізу жоспарын тоқтатуға келісті.

Еске сала кетсек, 8 наурыз күні Қытай үкіметі Канададан әкелінетін бірқатар өнімге қосымша баж салығы енгізілетінін жариялады. 

Бұған дейін Трамптың Канададан, Мексикадан, Қытайдан импортталатын жаңа тарифтері күшіне енгенін жазған болатынбыз.