Трамп пен Путин телефон арқылы тілдесті
АСТАНА. KAZINFORM – АҚШ президенті Дональд Трамп дүйсенбі күні ресейлік әріптесі Владимир Путинмен Украинадағы қақтығысты тоқтату мәселесі бойынша келіссөздер жүргізді, деп хабарлайды Кazinform агенттігінің меншікті тілшісі.
Ресей президенті журналистерге дүйсенбі күні Трамп екеуінің арасында телефон арқылы болған әңгімесі екі сағаттан астам уақытқа созылғанын және оның мазмұнды болғанын айтты.
— Арада өте мазмұнды әрі ашық әңгіме болды. Ең алдымен, мен АҚШ президентіне Ресей мен Украинаның арасында бейбіт келісімге келу үшін тікелей келіссөздерді қайта бастауға АҚШ-тың қолдау білдіргені үшін алғыс айттым. АҚШ президенті атысты тоқтату мәселесі бойынша өз ұстанымын білдірді. Өз тарапымнан, Ресей де украин дағдарысын бейбіт жолмен реттеуді қолдайтынын атап өттім. Біз бейбітшілікке жетудің ең тиімді жолдарын анықтауымыз керек, – деді Владимир Путин BBC-ге берген түсініктемесінде.
Associated Press агенттігінің хабарлауынша, Владимир Путин Мәскеу қақтығысты тоқтатуға дайын екенін және барлық тарапты қанағаттандыратын ымыралы шешімдерді табу қажет екенін айтты.
Бұған дейін The Times басылымы екі елдің басшылары атысты тоқтату мүмкіндігін, жеке кездесуді және екі ел арасындағы сауда қатынастарын жақсартуды жабық байланыс арнасы арқылы, аудармашылардың көмегімен талқылап жатқанын хабарлаған болатын.
Ақ үй бұл телефон әңгімесі туралы кейінірек журналистерге хабарлайтынын айтты. Әңгіме алдында қос тарап бұл келіссөздердің бейбіт процесте үлкен серпіліс әкелу ықтималдығын төмен бағалаған болатын.
Бұл қоңырау – Дональд Трамптың екінші президенттік мерзімі басталғалы белгілі болған екі ел басшылары арасындағы үшінші телефон арқылы сөйлесуі. Алғашқы екеуі ақпан және наурыз айларында өткен.
Путинмен сөйлесер алдында Трамп Украина президенті Владимир Зеленскиймен де телефон арқылы тілдесіп, украин қақтығысын тоқтату мәселесін талқылады.
Трамп пен Зеленский Ресей-Украина қақтығысын реттеуге мүмкіндік беретін қадамдарды талқылады. Екі президент Трамп Путинмен келіссөздерді аяқтаған соң тағы бір мәрте сөйлесуге уағдаласты.
Бұған дейін екі президенттің Украинадағы бейбіт реттеу және сауда мәселелері бойынша телефон арқылы тілдесуге ниет танытып отырғаны хабарланған еді.
