Трамп жеті федералдық агенттікте қысқарту жүргізуді бұйырды
АСТАНА. KAZINFORM – АҚШ президенті Дональд Трамп өзі қолға алған мемлекеттік бюрократиямен күрес жұмыстары аясында жеті федералдық агенттікте штат санын айтаралықтай қысқартуға бұйрық берді, деп хабарлайды ВВС.
Ақ үй сайтында жарияланған жарлықта заңға сәйкес өздерінің жарғылық қызметтерін атқаруды тоқтату және қызметкерлер саны мен олардың қызметтерін барынша қысқартуы тиіс мекемелердің тізімі берілген.
Олардың арасында «Азат Еуропа/Азатттық радиосы және Америка дауысын» қоса алғанда бес америкалық медиа-корпорацияны үйлестіретін АҚШ-тың жаһандық медиа жөніндегі агенттігі (USAGM) бар.
Сонымен қатар тізімге Музей және кітапханаларды басқару қызметі, Азшылықтар бизнесін дамыту агенттігі, АҚШ-тың баспанасыздықпен күрес жөніндегі ведомствоаралық кеңесі және басқалар кірген.
Трамп жарлығында құжат жарияланған күннен, яғни 21 наурыздан бастап, жеті күн ішінде агенттіктің басшылары Менеджмент және бюджет жөніндегі басқармаға жарлықтың қысқарту мен бюджетті қайта құрылымдау жөніндегі талаптарының толық орындалғанын растайтын есеп ұсынуы керек.
Журналистерді қорғау комитеті АҚШ Конгресінің басшылығын USAGM-ды Трамптың жарлығының салдарынан қорғау үшін шара қолдануға шақырды.
USAGM 49 тілде жұмыс істейтін хабар тарату компанияларының жұмысын үйлестіреді. Ал олардың барлығының апталық аудиториясы 361 млн адамды құрайды. Оның бюджетіне 2025 жылы 950 млн доллар қажет болды.
Осыған дейін АҚШ USAID-ты неге таратқалы жатқаны туралы сараптама жариялаған едік.
