Трамптың Украина мен Ресей жөніндегі арнайы өкілі бейбіт келіссөздерден шеттетілді
АСТАНА. KAZINFORM – Мәскеудің өтініші бойынша АҚШ президенті Дональд Трамптың Украина мен Ресей бойынша арнайы өкілі Кит Келлог соғысты тоқтату жөніндегі келіссөздерден шеттетілді.
Отставкадағы генерал-лейтенант Кит Келлог Сауд Арабиясында келіссөздер оның құзыретіне кіретініне қарамастан ресейлік және украиналық тараптармен болған екі кездесуге қатысқан жоқ.
Ресейлік тарап Келлогты тым украиншыл саясаткер деп санайды.
- Келлог – Украинаға тым жақын бұрынғы америкалық генерал. Ол біздің адам емес, біз іздеп жүрген калибр емес, - деп мәлімдеді бұл мәселе бойынша көпшілік алдында сөйлеуге өкілеттігі жоқ ресейлік шенеунік, деп хабарлады NBC News.
Трамп әкімшілігінің көпшілік алдында сөйлеуге өкілеттігі жоқ шенеунігі де Ресей Келлогтың бітімгершілік үдерісіне қатысуын қаламайтынын растады.
Ұлттық қауіпсіздік кеңесінің өкілі Джеймс Хьюит Келлог «әсіресе еуропалық одақтастарымызбен келіссөздер тұрғысынан команданың құнды бөлігі болып қала беретінін» мәлімдеді.
Бейсенбіде Трамп Ресейге арнайы елші Стив Уиткофты тағы да жіберді, содан кейін Ресей президенті Владимир Путин Ресей соғыс қимылдарын тоқтату туралы ұсыныспен келісетінін, бірақ оның шарттары бар екенін мәлімдеді.
