Триполидегі наразылық кезінде бір адам опат болды
АСТАНА. KAZINFORM — Ливияның Ұлттық бірлік үкіметі (ҰБҮ) күштерінің атқылауынан Триполи орталығында бір шеруші қаза тауып, бірнеше адам жараланды, деп жазады ТАСС.
Агенттік мәліметінше, ҰБҮ премьер-министрі Абдель Хамид Дбейбаның штаб-пәтері маңында наразы топқа оқ жаудырылған. Олар Абдель Хамидтің отставкаға кетуін талап еттті. Өз кезегінде Триполиде отырған үкімет Дбейбаның кеңсесіне басып кіру әрекетінің алдын алғаны туралы мәлімдеме жасады.
Сонымен қатар, Ливия Пресс агенттігінің хабарлауынша, наразылықтардың күшеюіне жауап ретінде Дбейба кабинетіндегі жеті министр мен төрт орынбасары отставкаға кету туралы өтініштерін берген. Олардың қатарында Денсаулық сақтау министрі, Тұрғын үй және құрылыс министрі, Жергілікті өзін-өзі басқару министрі, Су ресурстары министрі, Экономика министрі, сондай-ақ Мәдениет, Индустрия және минералды ресурстар министрі бар.
Дәл осы сәтте Триполи орталығына мыңдаған наразылық білдіруші жиналып, ҰБҮ-нің отставкаға кетуін талап етті. Барлық аймақтан келген ливиялықтар тобы Жасыл алаң мен премьер-министрдің штаб-пәтеріне қарай ағылып жатыр. Шерушілер Дбейба мен оның үкіметіндегі Ішкі істер министрлігінің басшысы Имад Трабелсидің сызылған портретін ұстап шықты. Ливия Пресс агенттігі таратқан бейнематериалдарға сүйенсек, наразылық білдірушілер «Халық үкіметтің құлағанын қалайды» және «Дбейба, сен қорқақ әрі америкалық агентсің» деп ұрандаған.
Триполидегі жағдай дүйсенбі күні кешке Махмуд Хамзаның 444-ші жауынгерлік бригадасы мен қауіпсіздік пен тұрақтылықты қамтамасыз ету аппараты арасында қақтығыс басталғанда ушыға түсті. Оқиғаның шиеленісуіне штаб басшысы Абделгани әл-Киклидің өлімі себеп болды.
Қақтығыс бірнеше сағатқа созылды, содан кейін GNA-дағы Қорғаныс министрлігі Триполидегі қауіпсіздік операциясының сәтті аяқталғанын хабарлады, ал Дбейба қаладағы қауіпсіздік қызметтерін қайта құрылымдауға бағытталған бірнеше шешім жариялады. Бұл шешім наразылық тудырып, жаңа қақтығыстарға әкелді. Ливия ақпарат құралдарының хабарлауынша, бір түннің ішінде бейбіт тұрғындарды қосқанда кемінде 6 адам қаза тауып, 70-ке жуық адам жараланған.
Сәрсенбі күні кешке Триполиде алғашқы шерулер өтті. Тұрғындар қантөгіс үшін Дбейба үкіметін айыптап, оның отставкаға кетуін талап етті.
Бұған дейін Ливияда қарулы топ жетекшісінің өлімі туралы хабардан кейін қақтығыстар басталғаны мәлім болды.
