Түрік полициясы митингке 2,2 млн адамның қатысқанын жоққа шығарды

АСТАНА. KAZINFORM — Құқық қорғау органдарының мәліметтері бойынша Түркияның Малтепе ауданындағы аумаққа ең көп дегенде 450 мың адам сыяды, деп хабарлайды ТАСС.

 Түркияның Бас қауіпсіздік басқармасы оппозиция жетекшісі Өзгүр Өзелдің қамауға алынған мэр Экрем Имамоғлыға қолдау көрсету үшін Ыстамбұлдағы митингке 2,2 миллион адам қатысты деген мәлімдемесін жоққа шығарды. Ведомство атап өткендей, оған 150 мың адам қатысты.

— Малтепе ауданындағы аумақ ең көп дегенде 450 мың адамды қамти алады. Халықтық-республикалық партияның митингісіне 150 мың адам қатысты, — делінген хабарламада.

Халықтық-республикалық партия жетекшісі сенбіде Ыстамбұлдың Малтепе ауданында өткен митингте Түркияда мерзімінен бұрын президенттік сайлау өткізу мақсатында қол жинау науқаны басталғанын мәлімдеді.

Айта кетейік, 19 наурызда Түркияда Ыстамбұл мэрі және оппозиция жетекшілерінің бірі Экрем Имамоғлы сыбайлас жемқорлық жасады және террористермен байланыста болды деген айыппен ұсталғаннан кейін Түркияда наразылық акциялары өтті. 

Ыстамбұлда жиналыстар мен митингілерге тыйым салынғанына қарамастан, елдің бірнеше провинциясында наразылықтар өтті.

23 наурызда Экрем Имамоғлы Түркия президенттігіне кандидат ретінде ұсынылды.

Түркия ІІМ мәліметінше, митингте кемінде 1,8 мың адам ұсталып, 260-ы қамауға алынды. Ең ауқымды наразылық акциялары Ыстамбұл, Анкара және Измирде ұйымдастырылды. Оппозиция жетекшісі Ыстамбұлдағы сенбі күні өткізілген митингті ең ауқымды деп атады.