Түркістан облысында қоқыс полигондарының иелеріне 4 млн теңге айыппұл салынды

ТҮРКІСТАН. ҚазАқпарат - Түркістан облысында санитариялық талаптарға сәйкес келмеген қоқыс полигондарының иелеріне айыппұл салынды. Кемшіліктерге жол берген 11 заңды, 1 лауазымды тұлға жалпы сомасы 4 226 940 теңге айыппұл төлейді, деп хабарлайды ҚазАқпарат тілшісі.

Түркістан облысында қатты тұрмыстық қалдықтарды тастауға арналған 127 полигон бар. Олардың 70-і мемлекеттің меншігінде болса, қалған 57 полигон жекеменшіктің балансына берілген.

Түркістан облысының санитариялық-эпидемиологиялық бақылау басқармасы құзыретті органдармен бірге мемлекет меншігіндегі полигондар жұмысына мониторинг жүргізіп, біршама кемшіліктерді анықтады.

«​​​​​​​​Жалпы қатты тұрмыстық қалдықтар полигондарының санитариялық-қорғаныш аймағы 1000 метр болуы тиіс. Ал, Арыс қаласы мен Сарыағаш ауданында полигонның санитариялық-қорғаныш аймағында тұрғын үйлердің орналасуына жол берген», - дейді Түркістан облысының СЭБД баспасөз хатшысы Ардақ Берден.

Сондай-ақ, тексеру нәтижесінде полигондардың басым бөлігінде қоқыс тасымалы көліктерінің дөңгелектерін зарарсыздандырушы дезинфекциялау бетон ваннасының болмауы, полигон айналасының қоршалмауы, дезинфекциялық шаралардың жүргізілмеуі сынды ҚР ДСМ бекіткен санитариялық талаптарға сәйкес келмейтіндігі анықталған.