Түркістан облысында тағы екі су қоймасы салынады

АСТАНА. ҚазАқпарат – Түркістан облысында «Бәйдібек ата» және «Боралдай» су қоймалары салынады. Өңір әкімі Дархан Сатыбалды орталық коммуникациялар қызметінде өткен брифингіде осындай мәлімет айтты, деп хабарлайды ҚазАқпарат тілшісі.

«Түркістан өңіріндегі аймақтарда су тапшылығын шешу үшін бірнеше су нысанының құрылысы басталып, былтыр 2 нысан пайдалануға берілді. «Кеңсай-Қосқорған-2» су қоймасын салғанның арқасында жылына қосымша 34 млн текше метр ағын су жеткізуге мүмкіндік пайда болды. Ал Түркістан магистралды каналының 59 шақырымын бетондау арқылы 60 млн текше метр су үнемделді», - деді ол.

Әкімнің айтуынша, бұл бағыттағы жұмыс жалғасын табады.

«Бұдан бөлек, «Бәйдібек ата» және «Боралдай» су қоймалары салынады. Өңірде каналдарды тазалау, жөндеу жұмыстары тұрақты жалғасып жатыр», -деді Дархан Сатыбалды.