Түркістан облысының білім саласында жемқорлық деңгейі төмендеді
Әкімдіктің баспасөз қызметі хабарлауынша, мәжілісте ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Түркістан облысы бойынша департаментінің басшысы Ғ.Тұрсынбаев соңғы үш жылда республика бойынша білім саласындағы жемқорлық аясында 513 қылмыстық іс қозғалып, 305 тұлға қылмыстық жауапкершілікке тартылғанын мәлімдеген. Бұл республикалық көрсеткіш болып табылады.
Ал, Түркістан облысында соңғы үш жылда білім саласында сыбайлас жемқорлыққа қатысты 50 жағдай тіркелген. Бүгінде бірқатар тұлғалар қылмыстық жауапкершілікке тартылған.
Облыстық білім басқармасының басшысы Исатай Сағындықовтың айтуынша, 2018 жылдың 8 айында облыс аумағында білім беру ұйымдарының лауазымды тұлғаларымен жасалған 6 сыбайлас қылмыстық іс тіркелген. Оның 4-уі мектеп директор мен 1 техникалық қызмет көрсетуші және 1 жетекші маманға қатысты. Бұл өткен жылдағы тиісті мерзіммен салыстырғанда өңірдегі ахуалдың жақсарып, бес фактіге азайғанын көрсетеді. Өйткені 2017 жылдың 8 айында сыбайлас жемқорлыққа қатысты 11 жағдай тіркелген болатын.
Бүгінде басқарма тарапынан сыбайластықтың алдын алуға бағытталған облыстық деңгейде тиісті жұмыстар атқарылуда. Мектепке дейінгі білім беру ұйымдарына жолдама беру және кезекке қою процестері автоматты түрде жүргізіліп, бүгінгі күнге 481 мекеме немесе барлық 1368 мектепке дейінгі мекемелердің 35 пайызы осы жүйемен жұмыс жүргізуде. Жыл соңына дейін balabaqsha.sitcen.kz порталына балабақшалардың 100 пайызын қосу жоспарлануда. Жүйе қызметімен бүгінде 12 мыңнан астам бүлдіршін балабақшаға орналасқан. Сондай-ақ облыстың 902 (100%) мектебінде jumys.sitcen.kz жүйесі енгізілген. Бүгінге дейін аталған жүйе қызметі арқылы 933 бос жұмыс орын жарияланып, 321 адам жұмысқа орналасқан.