Түркістанда қызмет бабында қаза тапқан полицейлердің жұбайлары марапатталды

ТҮРКІСТАН. ҚазАқпарат - Халықаралық әйелдер мерекесі қарсаңында қызмет бабында қайтыс болған түркістандық полицейлердің жұбайлары мен аналары марапатталды, деп хабарлайды ҚазАқпарат тілшісі.

Түркістан облысы полиция департаментінің бастығы, полиция генерал-майоры Мұрат Қабденов қызмет бабында қайтыс болған полицейлердің жұбайларын 8 наурыз мерекесімен құттықтады.

«Қызметін адал атқарып, ерлікпен қаза тапқан әріптестерімізді біз ешқашан ұмытпаймыз. Олардың ерлігі әрқашан біздің жадымызда!», - деген полиция генерал-майоры қаза болған полицейлердің жұбайларына гүл шоқтары мен бағалы сыйлық табыс етті.

Іс-шараға қатысқан Динара Наршабаеваның жолдасы ішкі істер саласында учаскелік полиция инспекторы болып еңбек еткен.

Қызмет бабында жол апатынан қаза тапқан тәртіп сақшысының соңында 4 баласы қалыпты.

«Полицияның жұмысы өте ауыр. Олар күн-түн демей кез келген уақытта жұмыстан табылады. Сондықтан тәртіп сақшыларына құрметім шексіз», - дейді ол.

Сондай-ақ, 8 наурыз мерекесінің қарсаңында облыста қоғамдық тыныштықты қамтамасыз етіп жүрген 30-дан астам шенді ару арнайы марапатқа ие болды.

Олардың ішінде тергеушілер, анықтаушылар, криминалистер, жедел уәкілдер, ювеналдық полиция қызметкерлері және учаскелік полиция инспекторлары бар.

Қызметтік міндеттін абыроймен атқарып, құқықтық тәртіпті қамтамасыз етуге қосқан үлесі үшін формалы бойжеткендер ҚР ІІМ Құрмет грамотасына, арнайы медаль мен төсбелгілерге ие болды.