Түркия билігі Ыстамбұл мэрі ұсталғаннан кейін шеруге шығуға тыйым салды
ЫСТАНБҰЛ. KAZINFORM – Ыстамбұл, Анкара, Измир және Ризе қалаларында жаппай шерулер мен наразылық шерулері өтті. Алайда Түркияның ең ірі мегаполисінде жиналыстар мен митингілерге тыйым салынды, деп хабарлайды Kazinform тілшісі.
Азаматтар арасындағы тәртіпсіздікке президент Режеп Тайып Ердоғанның басты саяси қарсыластарының бірі саналатын Ыстамбұл мэрі Экрем Имамоглудың ұсталуы себеп болды. Имамоглу қылмыстық топ құрды, пара алды, алаяқтық жасады, тендерлерге араласты, билікті асыра пайдаланды, шенеуніктерге тіл тигізді деген айыптармен қамауға алынды, бұл оппозиция жақтастары мен құқық қорғаушылардың жаппай наразылығын тудырды.
Түркияның әділет министрі Йылмаз Тунчтың айтуынша, Ыстамбұл бас прокуратурасы жүргізген тергеу аясында Ыстамбұл муниципалитетінің басшысын қоса алғанда, 106 күдіктіні қамауға алу туралы санкция берілген.
— Түркия Республикасы — құқықтық мемлекет. Конституциямыздың 9-бабында сот билігін түрік ұлты атынан жүзеге асыратын заңның үстемдігі бәрімізге тең, жеке адамға да, қандай да бір топқа артықшылық берілмейді, — деді Тунч.
Сонымен бірге оппозиция бақылаушылары 2024 жылдың 31 наурызында муниципалдық сайлауда Республикалық халық партиясынан (РХП) сайланған Ыстамбұл мэрі Ердоған билігіне қарсы күрестің символына айналғанын атап өтті. Оның қамауға алынуы ірі қалаларда наразылық шерулерін тудырды, онда адамдар Имамоглының тез арада босатылуын талап етіп, қазіргі үкіметке наразылықтарын білдіріп көшелерге шықты.
Наразылық білдірушілер қамауға алынғаны туралы хабарлағаннан кейін бірден жаяу марш жасаған, алайда құқық қорғау күштері халықтың ілгерілеуіне тосқауыл қойды. Билік пен қауіпсіздік күштерінің күш-жігеріне қарамастан, белгілі бір топтардың наразылықтары жалғасып, жағдай шиеленіскен күйде қалып отыр.
Ыстамбұл ықтимал тәртіпсіздіктердің алдын алу үшін наурыздың 19-ы мен 23-і аралығында митингілер, шерулер мен баспасөз мәслихаттарын өткізуге тыйым салды. Көптеген көшелер, даңғылдар мен аллеялар жабылған. Қала бойынша қоғамдық көліктерге шектеу қойылған.
Елдегі саяси жағдайға келіспейтіндерге оппозициялық партиялардың өкілдері, елдегі азаматтардың құқықтары мен бостандықтары бұзылды деп мәлімдеген құқық қорғау ұйымдары қолдау көрсетіп отыр. Көпшілік Имамоглының ұсталуын Ердоғанның саяси оппозициялық қозғалысты басып-жаншып, алдағы сайлау алдында өз ұстанымын нығайту әрекеті деп санайды.
Түркияда болып жатқан оқиғаға халықаралық қауымдастық та оң қабақ танытпады. Германия Сыртқы істер министрлігі Имамоглының ұсталуын демократияға ауыр соққы деп мәлімдеді.
— Еуропалық Одаққа кіруді қалайтын ел демократиялық құқықтық мемлекет қағидаттарының сақталуына кепілдік беруі керек, — делінген мәлімдемеде.
Түркияда жаппай наразылық бұған дейін де болған, бірақ қазіргі оқиғалар елдегі саяси шиеленістің өршуін әрі халық арасында наразылықтың күшеюін көрсетеді.
Еске сала кетейік, бұған дейін Ыстамбұл мэрі Экрем Имамоглу арнайы операция кезінде ұсталғанын жазған болатынбыз.
