Түркиядағы муниципалды сайлауда оппозициялық саясаткерлер алда келеді
АСТАНА. KAZINFORM — Түркияның Ыстамбұл, Анкара және Измир сияқты маңызды қалаларында өткен мэр сайлауында оппозициялық Республикалық халық партиясының кандидаттары алда келеді. Бұл туралы Anadolu Agency жазды.
Анкараның қазіргі мэрі, Республикалық халық партиясынан үміткер болған Мансур Яваш өз орнын сақтап қалды. Бюллетеньдердің 41,96 пайызын санау қорытындысы бойынша шенеунік 58,56 пайыз, билік партиясының кандидаты Тұрғыт Алтынок 33,63 пайыз дауыс жинаған.
Ыстамбұлда қазіргі қала мэрі әрі РХП кандидаты Экрем Имамоглу жеңіске жетті. Сайлау бюллетеньдерінің 67,96%-ын санағаннан кейін ол 50,31%, оның бәсекелесі Мұрат Курум 40,99% дауыс жинады.
Измирдегі сайлауда бюллетеньдердің 99,09 пайызын өңдегеннен кейін оппозиция өкілі Джемиль Тугай 48,88 пайызбен бірінші орында тұр.
Естеріңізге сала кетейік, 31 наурызда Түркияда муниципалды сайлау өтіп, оның барысында азаматтар ірі қалалардың, аудандардың әкімдерін және муниципалды кеңес мүшелерін сайлады.
Елде 61 миллионнан астам сайлаушы тіркелген, олар үшін 206 845 сайлау учаскесі ашылған.
Сайлауға 34 саяси партияның кандидаттары қатысты. Оның ішінде президент Режеп Тайып Ердоған басқаратын биліктегі Әділет және даму партиясы және тәуелсіз кандидаттар да бар.
