Түркиядағы наразылық: 1900-ге жуық адам ұсталды

АСТАНА. KAZINFORM — Түркияда 19-25 наурыз аралығында жаппай наразылықтар кезінде 1879 адам ұсталды. Бұл туралы 27 наурыз, бейсенбі күні елдің ішкі істер министрі Али Ерликая мәлімдеді, деп хабарлайды DW.

Министрдің айтуынша, ұсталғандардың 260-ы сот процесін күтіп қамауда отыр, 662 адамның істері сот қарауында, ал 489 адам босатылған.

Түркияның Ішкі істер министрлігі dpa агенттігіне хабарлағандай, барлық наразылық білдірушілер құқық қорғау органдарына қарсылық көрсеткені үшін ұсталған.

Ерликаяның сөзінше, жаппай наразылықтар барысында 150 полиция қызметкері жарақат алған. Елде көпшілік жиналыстар өткізуге салынған тыйым 1 сәуірге дейін ұзартылды.

Бұған дейін 1100-ден астам адамның ұсталғаны туралы хабарланған еді.

Айта кетейік, Түркияда Стамбул мэрі және оппозиция жетекшілерінің бірі Экрем Имамоглу ұсталып, кейін қамауға алынған соң жаппай наразылықтар басталды.

Стамбулда жиналыстар мен митингілерге тыйым салынғанына қарамастан, елдің бірнеше провинциясында наразылықтар өтті.

23 наурызда Экрем Имамоглу Түркия президенттігіне кандидат ретінде ұсынылды.