Түркияның ең бай кәсіпкері медициналық марихуана туралы заң жобасына қарсы шықты

АСТАНА. KAZINFORM — Түркияның ең бай кәсіпкері Мурад Үлкер елде медициналық мақсаттағы қарасораны заңдастыруға қарсы пікір білдірді, деп хабарлайды Kazinform тілшісі.

Соңғы айларда Түркия Парламенті бірқатар ауруды емдеуге арналған медициналық қарасораны заңдастыру мәселесін белсенді түрде талқылап келеді. Заң жобасын қолдаушылар бұл науқастардың өмір сапасын жақсартуға және шетелден әкелінетін дәрі-дәрмектерге тәуелділікті азайтуға мүмкіндік береді деп есептейді. Алайда қарсы тарап бұл бастаманың қауіптері бар екенін айтып, аса қатаң бақылау қажеттігін алға тартады.

Yıldız Holding директорлар кеңесінің мүшесі Мурад Үлкер елде медициналық қарасораның дәріханаларда сатылуына рұқсат беруге қатысты заң жобасын сынға алды. Ол мұндай шешім жастар арасында нашақорлықтың артуына, өлім-жітімнің көбеюіне және жол-көлік оқиғаларының жиілеуіне алып келуі мүмкін екенін ескертті. Оның айтуынша, мұндай жағдайлар каннабис заңдастырылған Канада мен АҚШ-та байқалған.

— Бұл жай ғана заңнамалық мәселе емес — бұл қоғамдық денсаулық пен моральдық таңдау мәселесі. Біз Түркияның болашағын қауіпке тіге алмаймыз, — деді Үлкер.

Кәсіпкердің пікірінше, қазіргі таңда Түркияда медициналық қарасораны өндіру, сату және тұтыну процестерін тиімді бақылауға арналған тетіктер жеткіліксіз. Ол бұл заң жобасы қылмыстық топтарға және «қара нарыққа» жол ашуы мүмкін деп қауіптенеді.

Үлкер депутаттарды бұл бастамадан бас тартуға және оны елдің ұзақ мерзімді мүдделері тұрғысынан қайта қарауға шақырды. Ол халықтың, әсіресе жастардың денсаулығына қатысты мәселелер тек жауапкершілікпен және ғылыми негізде қарастырылуы тиіс екенін айтты.

Бұған дейін Түркияның медициналық туризм саласындағы табысы артып келе жатқанын жазған едік.