Түркістан облысында 358 жұмыскердің еңбек құқығы қорғалды
ТҮРКІСТАН. KAZINFORM – Биылғы жылдың 9 айында өңірде 29 өндірістік жазатайым оқиға тіркелді. Салдарынан 37 адам зардап шексе, 6 адам қайтыс болды. Бұл туралы мемлекеттік еңбек инспекциясы комитетінің Түркістан облысы бойынша департаменті РММ басшысының міндетін атқарушы Берік Ибадуллаев мәлімдеді.
Биылғы жылдың 9 айында 1039 азаматтың арыз-шағымдарын қараған сала мамандары олардың барлығына заңмен белгіленген мерзімде жауап берген. Аталған арыздар бойынша мекемелер мен кәсіпорындарда барлығы 151 тексеру жүргізіп, нәтижесінде 262 заң бұзушылықты анықтады. Соның негізінде 122 нұсқама беріліп, еңбек заңнамасының бұзылуы бойынша 798 хаттама толтырылды. Сондай-ақ, еңбек заңнамасын сақтамаған мекемелерге 25,5 млн теңге көлемінде айыппұл салды.
«Биылғы жылдың 9 айында облыс бойынша 5 кәсіпорында 402 жұмыскер алдында 204,1 млн теңге жалақы қарызының орын алғаны анықталды. Жұмыс берушілерге орындалуы міндетті нұсқамалар беру арқылы 102,9 млн теңгесі өндіріліп, 358 жұмыскердің еңбек құқықтары қорғалды. Бүгінгі таңда, «Қыран» футбол клубының 44 жұмыскері алдында 101,2 млн теңге жалақы қарызы бойынша құжаттар сот орындаушыларға жолданды. Қазір өндіру жұмыстары жалғасуда» - деді Берік Ибадуллаев.
Жалпы жыл басынан бері өңірде 29 өндірістік жазатайым оқиға болды. Салдарынан 37 адам зардап шексе, 6 адам қайтыс болды. Аталған өндірістік жарақаттар бойынша жұмыс берушілерге қылмыстық іс қозғау үшін 25 іс-құжат құқық қорғау органдарына жолданды.
«Өндірістік жарақаттану деңгейін төмендету және алдын алу шараларын қабылдау мақсатында өңірдегі кәсіпорындарда «Халықтық бақылау» жобасы мен «Нөлдік жарақаттану – Vizion Zero» тұжырымдамасына қосылу, сондай-ақ, еңбекті қорғаудың заманауи стандарттарын қабылдау бойынша ақпараттық түсіндіру жұмыстары жүргізілді. Нәтижесінде, 6 кәсіпорын «Халықтық бақылау» жобасын жүзеге асырып, 18 кәсіпорын «Нөлдік жарақаттану – Vizion Zero» тұжырымдамасына қосылды» - деді Берік Ибадуллаев.
Мемлекеттік еңбек инспекторлары еңбек заңнамасы және еңбекті қорғау талаптарының сақталуы бойынша облыстағы өндіріс және құрылыс нысандарындағы мердігер мекемелерге тұрақты түрде түсіндіру жұмыстарын жүргізіп келеді және кездесулер мен семинар-кеңестер өткізілуде.
Бір қуанарлығы, жыл басынан бері облыс көлемінде еңбек жанжалы болмаған. Әлеуметтік шиеленістің туындау тәуекелі бар 157 кәсіпорын анықталып, олармен алгоритмге сәйкес жұмыс жүргізілген. Еңбек тәуекелдерінің картасына сәйкес өңірдің 23 кәсіпорны еңбек жанжалдарының алдын алу және әлеуметтік шиеленістің туындауы бойынша тұрақты мониторингке алынған. Бұл ретте, 8 кәсіпорын өңірдің еңбек қатынастары мен қауіпсіздік моделі бойынша тәуекелдің жоғары деңгейіне жатады.
«Бүгінгі таңда жоғарыда аталған кәсіпорын қызметкерлерінен өтініштер, оның ішінде бейнеөтініштер түскен жоқ. Қазіргі уақытта жоғарыда аталған барлық кәсіпорындар штаттық режимде жұмыс істейді, олар бойынша облыстың мемлекеттік еңбек инспекторлары тұрақты мониторинг жүргізуде» - деді Берік Ибадуллаев.
