Түркістан облысында пробациялық есептегі 142 адам түзеу мекемесіне қайтарылды

АСТАНА. KAZINFORM — Сонымен қатар, облыс прокуратурасы «ҚАО ААЖ» арқылы пробациялық бақылаудан тыс қалған 77 құқық бұзушылықты анықтады. Бұл туралы Түркістан облысы прокуратурасы мәлім етті.

Президенттің «Әділ Қазақстан» Жолдауын іске асыру мақсатында Түркістан облысының прокуратурасы 2024 жылғы 16 қараша сағат 20.00-22.00 уақыт аралығында «Қадағалау» профилактикалық іс-шарасын өткізді.

Аталған іс-шара аясында 17 қала/аудан прокурорлары мобильдік топпен бірге есептегі тұлғалардың үкіммен белгіленген шектеулерді орындау жағдайына кенеттен тексеру жүргізді.

Тексеру барысында 321 сотталғанның белгіленген уақытта тұрғылықты мекенжайларында болуы тексеріліп, бұзушылыққа жол берген 9 есептегі тұлға анықталды. Сондай-ақ, 2 тұлғаға қатысты бас бостандығынан айыру түріндегі жазаға ауыстыру туралы ұсыныс сотқа жолданды.

— Сонымен қатар, облыс прокуратурасы «ҚАО ААЖ» арқылы пробациялық бақылаудан тыс қалған 77 құқық бұзушылықты анықтады. 43 тұлғаға қатысты бас бостандығынан айыруға ауыстыру туралы ұсыныс сотқа жолданды, қазіргі таңда 9 тұлғаға қатысты үкім өзгертілді. Бұдан бөлек, биыл жазаны бас бостандығынан айыруға ауыстыру туралы 142 ұсыныс қанағаттандырылды, — делінген хабарламада.

Айта кетейік, өңірде қайта жасалатын қылмыстың алдын алу мақсатында профилактикалық жұмыстар қарқынды жүргізілуде.

Бұған дейін Жетісу облысының прокуратурасы 6 жетісулықтың алимент бойынша қарызы 20 миллион теңгеден асып кеткенін хабарлады.