Түркістан облысында соңғы бір айда 6 бала суға кеткен
ТҮРКІСТАН. KAINFORM - Қайғылы оқиғалардың басым бөлігі облыстың оңтүстік өңірлерінде болған. Атап айтар болсақ, Сарыағаш, Келес, Мақтаарал, Жетісай, Шардара аудандарында тіркеліп отыр. Бұл туралы Түркістан облысының ТЖД Азаматтық қорғаныс басқармасының бастығы Дүйсен Оразгелді мәлімдеді.
Бүгінгі таңда өңірдегі күн райы +30 градусты көрсетіп тұр. Сондықтан егіс алқаптарында жүрген адамдардың өзендерге, каналдарға түсуі әлі де тоқтар емес.
«Өңірде жыл басынан бері 58 адам суға кеткен. Оның ішінде 31 бала бар. Қайғылы жағдайлардың басым бөлігі Сырдария және Арыс өзенінде, каналдарда және су қоймаларда тіркеліп отыр. Мәселен, суға шомылу маусымы басталғалы 41 адам суға кетсе, оның 11-і өзендерде, 16-сы каналдарда, 5-еуі су қоймаларында болды. Сонымен қатар, тамыз айы басталғалы 13 адам суға кеткен. Оның ішінде 6 бала бар. Балалардың ата-ананың қарауынсыз қалып кетуі және өз күшін бағалай алмау мен жүзе алмауы қайғылы жағдайларға негізгі себеп болуда», - деді Дүйсен Оразгелді.
Бүгінгі таңда, Келес ауданындағы Сырдария өзенінен 36 жастағы бір адамның денесі іздестірілуде. Достарының айтуынша, ол 25 тамыз күні белгісіз жағдайда суға батып кеткен. Іздеу жұмыстарына ТЖД Жедел-құтқару жасағы, 6 құтқарушы, 1 техника және 1 қайық жұмылдырылды.
«Адамдардың қауіпсіздігін қамтамасыз ету мақсатында 84 құтқару бекеті және 32 медициналық және 18 қоғамдық тәртіпті сақтау бекеттері орнатылды. Жасөспірім балалардың қауіпсіздігі бойынша да тиісті жұмыстар жүргізіліп келеді. Әлеуметтік жағдайы төмен және көпбалалы отбасылардан шыққан 8000-ға жуық баланы тегін шомылдыру және жүзуге үйрету жұмыстары жүргізіліп жатыр. Сондай-ақ, судағы қауіпсіздік бойынша үгіт-насихат жұмыстары кеңінен түсіндіріліп келеді», - деді Дүйсен Оразгелді.
Айта кетейік, бұдан бұрын Түркістан облысында 500-ге жуық мұғалім жалған дипломмен еңбек етіп келгені жайын жазған болатынбыз.
