Түркістан облысында заңсыз вейп цехы жабылып, көлік тәркіленді
ТҮРКІСТАН. KAZINFORM - Сайрам аудандық сотында вейп-темекі өнімдерін заңсыз өндіру және қылмыстық жолмен келген ақшаны заңдастыру фактілері бойынша қылмыстық іс қаралды.
Сот материалдарына сәйкес, 2024 жылдың қаңтарында екі сотталушылар өздері ашқан серіктестіктің атына темекі бұйымдарына арналған хош иістендіргіштер мен сұйықтықтарды, өнімді автоматты түрде орайтын құрал-жабдықты шетелден сатып алған. Сондай-ақ вейп табагі мен оны ұсақтайтын машинаны алған олар Ақсукент ауылынан ғимарат жалдап, 11 жалдамалы жұмысшыны жұмысқа қабылдап, цех ашқан.
2025 жылдың ақпанында өндіріс орнын жасыру мақсатында олар цехті Бескепе ауылындағы ғимаратқа көшірген. Тергеу дерегінше, 2024 жылдың маусымынан 2025 жылдың наурызына дейін заңсыз өндіріс арқылы 38 млн теңгеден астам пайда тапқан.
Бұдан бөлек, сотталушынің бірі қылмыстық жолмен келген ақшаны заңдастыру мақсатында 2022 жылғы «Toyota Hilux» автокөлігін сатып алып, оны үшінші тұлға атына рәсімдеген.
Сотта прокурор айыппұл түріндегі жаза тағайындауды сұрады. Сотталушылар да қылмысын мойындап, айыппұл кесуді өтінген.
Сот үкімімен сотталушының біріне 7 млн 864 мың теңге айыппұл салынса, екіншісіне 3 млн 932 мың теңге айыппұл тағайындалды. Сондай-ақ «Toyota Hilux» автокөлігі мемлекет пайдасына тәркіленді.
- Сот жаза тағайындау кезінде айыптылардың бұрын сотты болмағанын, жасаған қылмысын мойындап, өкінуін, отбасылық жағдайын және жас балалары барын ескерді. Ауырлататын мән-жай ретінде қылмысты адамдар тобы алдын ала сөз байласып жасағаны танылды. Үкім заңды күшіне енген жоқ, - делінген Түркістан облыстық сотының баспасөз қызметі таратқан ақпаратта.
Айта кетейік, бұдан бұрын Шымкенттегі М.Әуезов атындағы университеттің бұрынғы басшыларына үкім шыққанын жазған болатынбыз.
