Түркістан облысындағы мақта кластеріне 1400 жұмысшы қажет

ТҮРКІСТАН. KAZINFORM - Әрбір маманға 300 000 – 350 000 теңге аралығында жалақы беріледі. 

Арыс қаласы мен Отырар ауданындағы 32 мың гектар алқапқа мақта кластері құрылады. Бүгінде бұл бағыттағы жұмыстар басталып та кетті. Аталған жоба аясында «Алтын Мақта» ЖШС-не 1400 жұмысшы маман қажет.

Атап айтар болсақ, 50 – трактор жүргізушісі, 250 – жүк тиеуші, 300 – дән себу кезіндегі жұмысшылар, 400 – тамшылатып суару жүйесін жалғаушылар, 400 – егістік алқабын бақылаушы керек. 

- Әрбір маманға 300 000 – 350 000 теңге аралығында жалақы беріледі. Басқа аудан, қалалардан келетіндерге тұратын жер мен үш мезгіл тамақ қарастырылған. Басты міндетіміз - әрбір жұмыссыз азаматтың тұрақты жұмысқа орналасып, лайықты өмір сүруіне жағдай жасау, – дейді облыстық еңбек мобильді орталығының директоры Абзал Дәулетұлы. 

Айта кетейік, бұдан бұрын Түркістан облысында егін егетін жердің 32 пайызы сорланып кеткенін жазған болатынбыз.