Түркістан облысындағы трассаларда жүк көліктері үшін қозғалыс шектелді

ТҮРКІСТАН. KAZINFORM — Республикалық маңызы бар жолдарда жүк көліктері үшін қозғалыс шектелді. Бұл туралы Түркістан облысы полиция департаментінің баспасөз қызметі мәлімдеді.

Тұман түсіп, қардың бұрқасындатып жаууына байланысты Түркістан облысымен шекаралас Жамбыл облысының аумағындағы автожолдарда көлік жүруі қиындай түсті. Сол себепті, «Ташкент — Шымкент — Тараз — Алматы-Хоргос» республикалық маңызы бар автожолының 593-620 шақырым учаскесінде жүк көліктеріне қозғалыс шектелді. Бұл Жамбыл облысы мен Түркістан облысына қарасты Түлкібас ауданы Т.Рысқұлов ауылының аумағын қамтиды. 

«Полиция қызметкерлері жүргізушілерге жолда мұқият болуды ескертеді. Аса қажеттілік болмаса алыс жолға шықпауларыңызды сұраймыз. Сондай-ақ, жол ережелерін сақтап жүру қажет. Ал, жазғы доңғалақтармен мүлдем жолға шығуға болмайды» - делінген Түркістан облысы полиция департаментінің баспасөз қызметі таратқан ақпаратта.