Қазақстанның оңтүстігіндегі бес өңірде су алу көлемі 7,9 млрд текше метрге жетті

ТҮРКІСТАН. KAZINFORM — Бұл туралы Су ресурстары және ирригация министрлігі мәлім етті.

Бүгінгі таңда өңір бойынша жалпы су алу көлемі 3,011 млрд текше метр, ал жоспарланған лимит — 3,645 млрд текше метр. Қалған 17,4% суару маусымы аяқталғанға дейін алынады.

Атап айтқанда, Жетісай және Мақтаарал аудандарының егістік жерлерін суаратын «Достық» мемлекетаралық каналынан алынған су көлемі 787,7 млн текше метр. Ал Отырар, Шардара аудандары мен Арыс қаласын сумен қамтамасыз ететін «Қызылқұм» магистральдық каналынан алынған су мөлшері 947 млн текше метр. Вегетация кезеңі басталғалы бері Түркістан облысындағы «Қазсушар» филиалы диқандармен су беру бойынша 9 608 келісімшарт жасасқан.

— Жалпы алғанда Қазақстанның оңтүстігіндегі бес өңірде су алу көлемі 7,9 млрд текше метрге жетті. Вегетация кезеңінің соңына дейін тағы 2,2 млрд текше метр су алу жоспарланып отыр. Қазір Түркістан облысында егістіктер кезекпен суарылып жатыр. Аймақтағы министрліктің жұмыс тобы суармалы судың әділ бөлінуіне тұрақты бақылау және мониторинг жүргізуде, — деді Су ресурстары және ирригация бірінші вице-министрі Нұрлан Алдамжаров.

Қазақстанның оңтүстігінде суару кезеңі 20 күнге ерте басталғанын еске сала кетейік. Ауа температурасының жоғары болуы мен жауын-шашынның болмауы бұған себеп болған еді.

Еске сала кетейік, су саласы мамандары суармалы суды әділ бөлу үшін түнгі кезекшілікке шыға бастағанын жазған едік.