Түркістан облысының тұрғыны өзінің туу дерегін 30 жылдан кейін дәлелдеді

ТҮРКІСТАН. KAZINFORM - Ордабасы аудандық соты ерекше істі қарады.

Арызданушы 1994 жылы Бөген ауылындағы ауруханада дүниеге келген. Алайда ата-анасы сол уақытта тиісті құжаттарды рәсімдемегендіктен, ол ешқашан ресми түрде туу туралы куәлік алмаған. Осыған байланысты азамат өмір бойы заңды құжатсыз қалып, тек мектепті бітіргені жөніндегі аттестатпен шектеліп келген.

Бүгінде ол отбасылы, азаматтық некеде төрт баласы бар. Сотта куәлардың жауабы, аудандық жұмыспен қамту және әлеуметтік бағдарламалар бөлімі өкілінің қорытындысы және «Медикал Геномикс» ЖШС-нің сараптамасы оның жеке басын толықтай дәлелдеді.

Сот Қазақстан Республикасы Жоғарғы Сотының 2002 жылғы 28 маусымдағы №13 «Заңдық маңызы бар фактілерді анықтау туралы істер бойынша сот практикасы туралы» нормативтік қаулысына және Азаматтық процестік кодекстің тиісті баптарына сүйене отырып, арызданушының талабын толық қанағаттандырды.

Осылайша, 2025 жылдың 20 маусымында Ордабасы аудандық сотының шешімімен азаматтың дүниеге келген фактісі ресми түрде анықталды. Шешім заңды күшіне енді.

Айта кетейік, бұдан бұрын Шымкентте оқушыны ұрған мұғалім қамауға алынғанын жазған болатынбыз.