Түркістан түркі әлемінің туристік астанасына айналды — Димаш Құдайберген
ТҮРКІСТАН. KAZINFORM - Бүгін қазақтың мақтанышы, әнші Димаш Құдайберген Түркістан қаласына келді. Облыс әкімі Дархан Сатыбалды әншімен арнайы кездесіп, құрмет көрсетті.
Түркістан облысының әкімі Дархан Сатыбалды еліміздің атын әлемдік аренада танытып жүрген жас өнерпаздың алдағы жұмыстарына сәттілік тіледі. Сондай-ақ, бұл сапардың Оңтүстік өңірінің руханият саласына, өңір туризмін дамытуға зор серпін беретіндігін айтып өтті.
«Қазіргі таңда, өңірде руханият саласында бірқатар бастамалар қолға алынып, жүзеге асып жатыр. Республикалық, халықаралық деңгейдегі шаралар — өңірімізге туристердің, қадірлі қонақтардың келуіне себеп болып отыр. Солардың бірі — «Voice of Turan» халықаралық қазақ әндерін орындаушылар байқауы. Биыл 5-ші рет ұйымдастырылып отырған байқауда әлемнің 20-ға жуық елінен өнерпаз қатысып, қазақ әндерін шырқайды. Осы байқау барысында әлемнің қай елінде болмасын әншілердің Сіздің орындаған әндеріңізге деген қызығушылығы басым екендігі байқалады. Бұл — біз үшін қуаныш әрі зор жауапкершілік», — деген облыс әкімі әншіні халықаралық қазақ әндерін орындаушылар байқауына құрметті қонақ болуға шақырды.
Әнші өз сөзінде Түркістанның рухани орталық ретінде қарыштауына таңданысын жеткізіп, өңір басшысына алғысын жеткізді.
«Түркістанның жаңа кейпіне, өзгеріске таң қалдым. Барлығы ұнап жатыр. Ес білгелі алғаш рет келуім, ерекше әсер алдым. Елдің осындай әдемі шаһарда тұрып жатқанын, еңсесі көтеріліп жатқанын көргеніме қуанып отырмын. Түркістан бүгінде түркі әлемінің туристік астанасына айналып, дүние жүзіне танылып жатыр. Ең бастысы еліміз тыныш болсын! Қалаларымыз әлемге танылып, халқымыздың дүниетанымы, руханияты көкжиегі кеңейе берсін!» — деді Димаш Құдайберген.
Айта кетейік, 13-14 қыркүйекте Астанада Димаш Құдайбергеннің концерті өтеді. Қазақстанның халық әртісі «Astana Arena» стадионында «Stranger» атты жеке концертінде өнер көрсетеді. Ұлттық дыбыстық және қазіргі әуендік техника үйлесім тапқан әлемдік деңгейдегі шоуда дәстүрлі және заманауи стильдегі композициялар орындалады. Ән кеші 8-13 қыркүйек аралығына жоспарланған V Дүниежүзілік көшпенділер ойындары аясында Мәдениет және ақпарат министрлігінің қолдауымен, «ДимашАли» шығармашылық орталығының ұйымдастыруымен өткізіледі.
