Түркістанда көлік қозғалысын басқару жүйесі интеллектуалды деңгейге көтеріліп келеді

Түркістан қаласында көлік қозғалысын басқару жүйесін жаңғырту жұмыстары қарқынды жүргізіліп келеді. Бұл бастама Президент Қасым-Жомарт Тоқаевтың жолдауында айтылған «қалалардағы инфрақұрылымды дамыту, тұрғындардың өмір сапасын арттыру және қауіпсіздікті қамтамасыз ету» бағыттарына сәйкес жүзеге асырылып жатыр. 

Түркістан қаласы әкімдігі ұсынған ақпаратқа сүйенсек, интеллектуалды көлік жүйесін енгізу арқылы қала көшелеріндегі қозғалыс біркелкі, тиімді және қауіпсіз болады, ал тұрғындар мен жүргізушілердің уақыты үнемделеді.

Жүйенің басты жаңалығы – бағдаршам сигналдарының өзгерісі туралы алдын ала хабарландыру функциясы. Бұл жүргізушілерге жасыл немесе қызыл түс қашан жанатынын алдын ала көрсету арқылы жылдамдықты соған сәйкес реттеуге мүмкіндік береді. Мұндай шешім жол қозғалысы ережелерін сақтауға көмектесіп қана қоймай, қала көшелеріндегі қозғалысты біркелкі әрі қауіпсіз етеді. Алынған мәліметтер негізінде кідірістер мен қажетсіз тоқтаулар азаяды, көлік ағыны үзіліссіз жүреді.

Сонымен қатар, бағдаршамдардың ағымдағы және тарихи циклдеріне сүйене отырып маршруттарды жоспарлау қарастырылған. Бұл жүргізушілерге кептеліссіз, оңтайлы бағыт таңдауға мүмкіндік береді. Нәтижесінде қала көшелеріндегі транспорт қозғалысы тиімді ұйымдастырылып, тұрғындар уақыты үнемделеді.

Жоба аясында интеллектуалды көлік жүйелері (ITS) және V2X (көлік пен инфрақұрылым арасындағы байланыс) технологияларын кезең-кезеңімен енгізуге дайындық жүргізілуде. Бұл технология көліктер мен жол инфрақұрылымы арасында нақты уақыттағы деректермен алмасуға мүмкіндік беріп, қалада «ақылды көлік» жүйесін қалыптастыруға жол ашады.

Қазіргі таңда осы жоба бойынша Яндекс ЖШС-пен келіссөздер жүргізілуде. Түркістан қаласында интеллектуалды көлік жүйесін енгізу Президенттің жолдауында айтылған «қалалардағы инфрақұрылымды дамытып, тұрғындардың өмір сапасын арттыру» мақсаттарына сәйкес жүзеге асырылуда.

Жобаның толық іске асуы қаладағы көлік қозғалысын жаңа деңгейге көтеріп, тұрғындарға ыңғайлы, қауіпсіз және тиімді қала ортасын құруға мүмкіндік береді.

Түркістан қаласында енгізіліп жатқан интеллектуалды көлік жүйесі – «Ақылды қала» жобасының маңызды бөлігі болып табылады. Бұл жүйе қала инфрақұрылымын жаңғыртып, тұрғындарға ыңғайлы, қауіпсіз және тиімді көлік қозғалысын қамтамасыз етеді. Нәтижесінде, Түркістан қаласындағы көлік жүйесі жаңа деңгейге көтеріліп, қала көшелері тиімді, тәртіпті және қауіпсіз болып, тұрғындардың күнделікті өмірі ыңғайлы әрі жайлы болмақ.

Айта кетейік, бұдан бұрын Түркістанда электронды қызметке деген сұраныс артып келе жатқанын жазған болатынбыз.