Түркістанда мопед тізгіндеген 21 жасөспірімнің ата-анасы жауапқа тартылды

ТҮРКІСТАН. KAZINFORM – Кейінгі бір апта ішінде қалада 8 мопед тіркеліп, мемлекеттік нөмір алды.

Жыл басынан бері патрульдік полицейлер скутер мен мопед жүргізушілерінен 26 заң бұзушылық анықтап, көліктерін айыптұраққа кіргізген. Сонымен қатар скутер мен мопед тізгіндегені үшін 21 жасөспірімнің ата-анасын әкімшілік жауапкершілікке тартты.

Ал, бүгін Түркістан қаласының патрульдік полиция батальон басшылығы жергілікті мопед жүргізушілерімен кездесті. Оларды алдағы уақытта мопед жүргізу үшін алдын ала тіркеуден өтуге шақырды. Сондай-ақ жүргізуші куәлігі жоқ болған жағдайда, автокөлік мектептерінде оқуға кеңес берді. 

— 5 сәуірге дейін мопед тіркелмесе және жүргізуші куәлігі болмаса, мұндай көлік құралдарын пайдалану заңсыз деп танылады. Осы ретте Түркістан қаласында кейінгі бір апта ішінде 8 мопед тіркеуге алынды. Мопед жүргізушілерінің басым бөлігі қазіргі таңда жеткізу қызметінде жұмыс істейді, - делінген Түркістан облысы полиция департаментінің баспасөз қызметі ұсынған ақпаратта. 

Айта кетейік, бұдан бұрын Шымкентте қарызын қайтара алмаған тұрғынды бір топ жігіт сабап тастағанын жазған болатынбыз.