Түркістанда жасөспірімдер балалар ойын алаңын қиратқан

ТҮРКІСТАН. KAZINFORM – Оқиға қаладағы Отырар шағын ауданында болды.

Кәмелетке толмаған балалардың ойын алаңындағы құрылғыларды сындырып тастаған әрекеті бейнежазбаға түсіп қалған. Полиция қызметкерлері жүргізген тексеру жұмыстарының барысында құрылғыларға едәуір зиян келтірген үш жасөспірім анықталды. 

- Тәртіп сақшылары құқық бұзушылық жасаған 6-шы сынып оқушыларының ата-аналарына түсіндіру жұмыстарын жүргізді. Оларға мұндай әрекеттерге жол бермеу және қоғамдық орындарға құрметпен қараудың маңыздылығын түсіндірді. Қоғамдық орындарды сақтау – әрбір азаматтың парызы. Қала тұрғындары мен қонақтарын абаттандыру ережелерін сақтауға, ойын алаңдарын, орындықтар мен өзге де нысандарды бүлдірмеуге, қоқысты арнайы орындарға тастауға және шаһарды таза ұстауға шақырамыз, - делінген Түркістан облысы полиция департаменті таратқан ақпаратта. 

Айта кетейік, бұдан бұрын Алматыда балалар үйінен кетіп қалған екі қыз іздестіріліп жатқанын жазған болатынбыз.