Түркістанда жекеменшік мектептің шатыры өртенді
ТҮРКІСТАН. KAZINFORM — Түркістанда екі қабатты жекеменшік мектеп ғимаратының шатырынан өрт шықты. Оны сөндіруге құтқарушылар жоғары дәрежедегі шақырту бойынша жұмылдырылды.
Өрт Нахипов көшесінде болған. Жалын ғимараттың шатырын шарпыған. Оқиға орнына Төтенше жағдайлар министрлігі мен Апаттар медицинасы орталығының 35 қызметкері және 9 техникасы тартылды.
Оқиға орнында жедел штаб құрылып, өртті сөндіру үшін судың үздіксіз берілуі ұйымдастырылды.
— Өрт толығымен сөндірілді. Зардап шеккендер жоқ. Өрттің шығу себебі анықталып жатыр, — деп хабарлады Түркістан облысы Төтенше жағдайлар департаменті.
Бұған дейін Шымкентте Қаратөбе тасжолында газ құбырында өрт шыққаны хабарланған еді. Оқиға салдарынан 1500-ден астам жеке үй мен бірқатар нысан газсыз қалған.
