Түркістандық полицейлер адам өлтірмек болды деген күдікпен ер адамды ұстады
ТҮРКІСТАН. KAZINFORM- Жергілікті тұрғынға танысын өлтірмек болды деп айып тағылған болатын. Қазір күдікті қамауға алынды.
Түркістан облысы полиция департаментінің баспасөз қызметі ұсынған ақпаратқа сүйенсек, жедел-іздестіру іс-шараларын жүргізген криминалдық полиция қызметкерлері кісі өлтіруге оқталған күдіктіні ұстаған.
«Ер адам бұл әрекетін мойындады. Аталған факті бойынша қылмыстық іс қозғалды және қажетті тергеу іс-шаралары жүргізілуде. Күдікті қамауға алынды. Қазіргі уақытта оқиғаның толық мән-жайы анықталуда. Тергеу мүддесіне сай өзге ақпараттар жария етуге жатпайды» - делінген ведомства ақпаратында.
Айта кетейік, бұдан бұрын жәбірленушінің 19 жерінен пышақ сұғып, қашып кеткен түркістандық тұрғын іздестіріліп жатқанын жазған болатынбыз. Күдіктіні іздеуге Түркістан полициясының жеке құрамы толығымен жұмылдырылды.
