Түркістандықтар қай саланың қызметіне жиі шағымданады
ТҮРКІСТАН. KAZINFORM – Өңір тұрғындарын жарық пен ауыз су және қоқыс мәселесін алаңдатады
Түркістан облысының әрбір аймағында тұрғындарды алаңдатқан мәселелер көп. Мысалы, Төлеби ауданындағы Зағамбар, Көксәйек, Зертас ауылдары мен Леңгір қаласының тұрғындары 109 бірыңғай байланыс телефонына 83 рет хабарласып, ауыз су құбырының жарылғандығын айтқан. Сондай-ақ, иесіз иеттердің көше кезіп жүруі бойынша 122 рет хабарлама қалдырған. Сауран ауданы, Шорнақ ауылындағы Темірбаев көшесінің тұрғындары жолдың жоқтығынан лай кешіп жүруге мәжбүр. Бұл бойынша 18 рет өтінім берілген. Ал, Түркістан қаласында жер қазып, кәріз жұмыстарын жөндеген мамандар, жұмыс орнын қалпына келтірмей кетіп қалған. Шауғар, Бекзат, Отырар мөлтекаудандарында осы іс қайталанған. Аталған жағдай бойынша 210 хабарлама тіркелген.
Жалпы орталықтағы хабарламаларды саралайтын болсақ, ең көп өтініш Түркістан, Кентау қаласы мен Төлеби, Бәйдібек, Сайрам аудандарынан түсетіндігін көреміз. Ал, негізгі мәселелерді электр жарығымен жабдықтау, ауыз су, ветеринариялық қызмет, көше жарықшамдары, тұрмыстық қалдықтар құрайды.
Облыстық цифрландыру, мемлекеттік қызметтер көрсету және архивтер басқармасының басшысы Марат Айнабековтің айтуынша, орталыққа түскен өтінімдердің 96 пайызы қоңырау шалу арқылы және 4 пайызы әлеуметтік желілер арқылы қабылданған. Биылғы жыл басынан бері 11 358 қоңырау түскен. Ал, қаңтар айы бойынша түскен өтінім 15 пайызға артқан.
- Өткен жылы 130 224 қоңырау түсіп, 126 887 өтінім дер кезінде, 3337 өтінім мерзімі өтіп жабылды. Қазіргі таңда орталықтың қызметін насихаттау бойынша жұмыс қарқынды істеліп жатыр. Атап айтқанда облыс аумағында орналасқан аудан-қалалардың барлығында инфобаннерлер орналастырылып, әлеуметтік желілерде 109-дың қызметі жайлы посттар күнделікті жарыққа шығып жатыр, - деді Марат Айнабеков.
Тағы бір айта кетерлігі, 109 желісінің жұмысына жасанды интеллект мүмкіндіктерін қолдану жоспарланып отыр. Бұл өз кезегінде өтініштердің сапалы орындалуын арттырады және мәселелердің тез әрі тиімді шешілуіне ықпал етпек.
Айта кетейік, бұдан бұрын Түркістанда заңсыз салынған 14 ғимарат сот шешімімен бұзылғандығын жазған болатынбыз.
