Түркістанға ерекше мәртебе берілсе, қалада жер үй салуға шектеу күшейтіле ме

АСТАНА. KAZINFORM – Түркістан облысы әкімінің орынбасары Бейсенбай Тәжібаев Түркістан қаласына заңмен ерекше мәртебе берілсе, шаһар аумағында жер үй салудың талаптары қалай өзгеретінін айтты.

-Түркістанға ерекше статус берілсе, жер үй салу тәртібі қалай өзгереді? Шектеу күшеймей ме, - деп сұрады журналист Мәжілістің жалпы отырысында.

Әкімдік өкілі тарихи маңызы бар ескерткіштердің маңайынан басқа аудандарда ешқандай шектеу болмайтынын айтты. Тек жер үй инфрақұрылымы дайын аумаққа салынуы керек.

- Бұл жерде қаланың орталығындағы белгіленген нысандарда жер үй салуға, әрине, болмайды. Болса да, қала аумағында жер үй салуға арналған телімдер бар, инфрақұрылым тартылған. Сол телімдерде үй салып, жұмыстарын жалғастыра алады. Тарихи ескерткіштер аумағында тыйым бар. Түркістан аумағында Қожа Ахмет Ясауи кесенесінен бөлек 25-ке жуық сақтауды қажет ететін нысан бар. Ол төңіректерге үй салуға болмайды. Туристік нысандар аумағында шектеулер енгізілген, - деді Бейсенбай Тәжібаев.

Айта кетейік, аталған құжат аясында Қожа Ахмет Ясауи кесенесінен 100 метр радиуста биік ғимарат салуға заңмен тыйым салынбақ.

Сондай-ақ, әкімдік өкілі депутаттарға Түркістан қаласы неге арақсыз қалаға айналмай жатқанын түсіндірді.