Түркістанға қатысты мазмұнды жұмыстарды да қолға алуымыз керек – Сенат төрағасы
АСТАНА. KAZINFORM – Түркістанды дамыту бағытындағы жұмыс дәйекті және жүйелі түрде жүргізілуі қажет. Бұл туралы Сенат төрағасы Мәулен Әшімбаев мәлім етті.

- Президентіміз Қасым-Жомарт Кемелұлы Тоқаевтың тапсырмасымен Түркістанды туризм орталығы ретінде дамытуға арналған үлкен бағдарлама жүзеге асырылып жатыр. Бүгін қаралып жатқан заң да соның аясында әзірленді. Осы тұрғыдан келгенде Түркістанда Ясауитану орталығын қалыптастыру және ойшылға арналған музейді экспонаттармен, тиісті контентпен толтырудың маңызы зор. Бұл нысандарды Ясауидің өмірі мен ілімін дәріптейтін негізгі тетік ретінде қалыптастыру қажет, – деді Мәулен Әшімбаев Сенаттың жалпы отырысында.
Сенат төрағасы Ясауидің еңбектеріне қатысты ғылыми зерттеулер жүргізу ісін де жүйелі түрде іске асырудың маңызды екенін айтты.
- Түркістанды түркі әлемінің орталығы ретінде дамыту үшін қажетті заңдарды қабылдаумен қатар, мазмұнды жұмыстарды да қолға алуымыз керек. Бұл іске атүсті қарауға болмайды. Ясауи, Әл-Фараби сияқты бабаларымызды насихаттамасақ, кімді насихаттаймыз?! Олар – біздің ұлттық бірегейлігіміздің темірқазықтары. Ұлттық бірегейлігімізді қалыптастыру үшін сол бабаларымыздың ілімдеріне табан тіреуіміз керек. Сондықтан алдағы уақытта осы заңдар аясында жан-жақты мазмұнды жұмыстар жүргізіледі деп сенеміз, – деді Мәулен Әшімбаев.
Сонымен қатар Палата спикері Түркістанның туристік әлеуетін толық іске асыру ісіне де баса мән берді.
- Мемлекет басшысы елімізде туризмді дамытуға қатысты нақты міндеттер жүктеді. Бұл бағытта Түркістанның әлеуеті зор. Қазір қалада қажетті инфрақұрылым қалыптасып қалды. Енді туристерді тартуға ерекше көңіл бөлген жөн. Әлемде туристер үшін үлкен бәсеке екені белгілі. Сондықтан осы салада да жүйелі жұмыс қажет, – деді Сенат төрағасы.
Бұдан бұрын хабарланғандай, бүгін Сенаттың жалпы отырысында «Түркістан қаласының ерекше мәртебесі туралы» заңы мен ілеспе құжат мақұлданды.
Сонымен қатар Түркістанға сапарлайтын әуе рейстері артып, Қожа Ахмет Ясауи кесенесінің айналасында биік ғимарат салуға тыйым салынды.