ТЖМ: Ақсай шатқалындағы 5 гектарды шарпыған өрт тұрғын үйлерге таралған жоқ

ҚОНАЕВ. KAZINFORM – Алматы облысы Қарасай ауданындағы Көклайсай саяжайлары маңында қураған шөптің жануы тіркелді. Өрт Ақсай шатқалы аумағында шыққан. Бұл туралы Төтенше жағдайлар министрлігінің баспасөз қызметі мәлім етті.

Ведомство мәліметінше, оқиға орнына Алматы облысы және Алматы қаласы Төтенше жағдайлар департаменттерінің, ҚР ТЖМ 28237 әскери бөлімінің жеке құрамы мен техникасы, сондай-ақ Мемлекеттік ұлттық табиғи парк қызметкерлері жұмылдырылған.

Жалпы саны 150-ден астам адам мен 20 техника тартылды.

«Құтқарушылардың жедел әрекетінің нәтижесінде өрттің тұрғын үйлер мен жақын маңдағы учаскелерге таралу қаупі жойылды. Алдын ала ақпарат бойынша, өрт аумағы 5 гектарды құрайды. Зардап шеккендер жоқ», – делінген хабарламада.

Саяжай тұрғындары алдын ала эвакуацияланды.

ҚР ТЖМ «Қазавиақұтқару» мекемесінің су ағызу құрылғысы бар Ми-8 тікұшағы да өрт сөндіру жұмыстарына жұмылдырылды.

Қиын рельеф пен қолайсыз ауа райына қарамастан, өртті сөндіру жалғасып жатыр.

Айта кетейік, Таразда өндірістік цех өртенді.