ҰБТ-дан 140 балды қалай алуға болады – үздіктерден лайфхак
АСТАНА. KAZINFORM – ҰБТ-да межелі 140 балды жинау үшін уақытты тиімді пайдалану керек. Наурыз айында өткен ҰБТ-ның қорытындысы бойынша бірде-бір сұрақтан мүлт кетпеген Аягөз Аққанова мен Санжар Қуандық дәл осылай дейді.
Jibek Joly арнасының «Бүгін LIVE» бағдарламасына сұхбат берген оқушылар мұндай нәтижеге қалай жеткендерін айтып берді.
- Бұл тынымсыз еңбектің нәтижесі деп ойлаймын. Уақытты тиімді пайдаланып, өнімді білім алу керек. Мысалы, 8-9 сағат тоқтаусыз оқуға болады, бірақ ол өнімсіз болуы мүмкін. Ал 5-6 сағат барлық назарды сабаққа аударып дайындалсаң, тіпті 140 балдан да асыруға болады, - дейді Санжар.
Білімпаз жастар ҰБТ тестілеуіне дайындалу үшін бірнеше лайфхакпен де бөлісті.
- ҰБТ-ға нәтижелі дайындалудың әртүрлі тәсілдері бар. Мәселен, жұптасып жұмыс істеуге болады. Өзімізге бір серіктес таңдап аламыз. Сосын белгілі бір тақырыпты терең оқып, бір-бірімізге сол тақырып бойынша сұрақ қоямыз. Солай екі оқушы бір-бірін дайындайды. Бұл өз қателеріңмен жұмыс істеуге, сұрақтың кез келген сипатына дайын болуға үйретеді, - дейді Аягөз.
Астанаға Алматы облысынан алғаш рет келіп, қаланың әсем көрінісіне көзі тоймай жүрген Санжар Қуандық осында оқуға түскісі келетінін де жасырмады. Ол болашақта қазақ тілі мен әдебиеті пәнінің мұғалімі болуды қалайтынын айтады.
- Көбінесе бұл мамандықты қыз балалар таңдайды. Менің осы мамандыққа түскім келетінін естігенде басқалар: «Неге ерлерге тән мамандық таңдамадың?» - деп таңқалады. Меніңше, ер адамның мұғалім болғаны тиімді. Менің Батыл есімді ағайым бар. Небәрі 21 жаста болса да, оның өзін өзі ұстауы, байсалдылығы мені тәнті етті. Мұғалім болуға мотивацияны сол кісіден аламын. Менің бойыма көптеген жақсы қасиетті сіңіріп жатыр деп айтсам болады. Осы ұстазымнан үйренгендерімді кейін балаларға бергім келеді, - дейді ол.
Ал Аягөз әлемде бейбітшілік болғанын қалайды. Сол үшін халықаралық қатынастар және дипломатия мамандығының нағыз майталманы болғысы келетінін айтты.
- Арманым – елші болу. Мемлекеттер арасындағы жанжалдарды шешуге өз үлесімді қосқым келеді. Әлемде бейбітшілік болғанын қалаймын. Болашақта Қытай, Франция сынды мемлекеттермен жұмыс істегім келеді, - дейді болашақ студент.
Алда грант иегерлерін анықтайтын әлі 2 тестілеу бар.
Еске сала кетейік, Алматы облысында 11-сынып оқушысы ҰБТ-дан 140 балл жинаған еді.
Сонымен қатар наурыз айында 22 талапкердің нәтижесі жойылды.
