Уинстон Черчилльдің көзілдірігі қомақты сомаға сатылымға шықты

АСТАНА. KAZINFORM — Уинстон Черчилль пайдаланған оқу көзілдірігі өте жоғары бағамен сатылымға шығарылды, деп жазды АЗӘРТАДЖ.

Черепах панцирінен жасалған дөңгелек жиекті көзілдірік шамамен 80 000 АҚШ долларына бағаланып отыр. Бұл көзілдіріктер Ұлыбритания премьер-министрі үшін Лондондағы C. W. Dixey and Sons компаниясында арнайы жасалған.

АЗӘРТАДЖ шетелдік БАҚ-қа сілтеме жасап хабарлағандай, Черчилль бұл компанияның әйгілі 1805 үлгісіндегі дөңгелек жиекті, «құлып тесігі» пішінді көпірі бар көзілдірігін таққан.

Әр жұп көзілдірік оның бет пішініне дәл сәйкес етіп дайындалып, Черчилльдің жеке талаптарына сай жетілдірілген. Мысалы, көзілдіріктің шеткі сабының ұштарындағы ақ нүктелер олардың не үшін қолданылатынын білдірген. Бұл көзілдіріктегі бір ақ нүкте — оның оқуға арналғанын көрсетеді. Басқа көзілдіріктер сөйлеу, сурет салу және жазу мақсатында арнайы жасалған.

Көзілдірікті Бристоль қаласындағы Paul Fraser Collectibles компаниясы сатылымға шығарған. Онымен бірге көзілдіріктің түпнұсқа қаптамасы және өндіруші компанияның шыққан тегін растайтын қол қойылған хаты ұсынылады.

Көзілдірікті компанияның ресми веб-сайтынан сатып алуға болады.

Айта кету керек, C. W. Dixey and Sons компаниясы 1777 жылы құрылған және бүгінге дейін жұмысын жалғастырып келеді. Бұл — әлемдегі ең көне және тәуелсіз көзілдірік өндіруші компания болып саналады. Ол бірнеше онжылдық бойы Британ корольдік отбасы үшін, соның ішінде жеті патша мен патшайымға арнап көзілдірік жасаған.

Еске сала кетейік, бұған дейін Диана ханшайым мен Уинстон Черчилльдің өсиеттері желіге шыққанын жазған едік.