15:17, 05 Қазан 2012 | GMT +5
Үкімет басшысы еліміздің 2013-2015 жылдарға арналған республикалық бюджет жобасын ұсынды
АСТАНА. 5 қазан. ҚазАқпарат - Бүгін «Нұр Отан» ХДП-ның ҚР Парламенті Мәжілісіндегі фракциясының кеңейтілген жиналысында ҚР Үкімет басшысы Серік Ахметов еліміздің 2013-2017 жылдарға арналған әлеуметтік-экономикалық даму болжамын және 2013-2015 жылдарға арналған республикалық бюджет жобасын ұсынды.

«Сонымен 2013-2017 жылдары экономиканың өсуі 6 пайыздан 7,6 пайызға дейін болады деп болжануда. Бұл параметрлер экономиканың орта мерзімдік кезеңдегі 7 пайыздық өсімін қамтамасыз етеді», - деді Премьер-Министр.
Оның сөзіне қарағанда, 2017 жылға қарай жалпы ішкі өнімнің жан басына шаққандағы өсімі 24,5 мың долларға жетеді деп күтілуде. 2013 жылы бұл көрсеткіш 14,5 мың АҚШ долларын құрайтын болады.
«2013-2017 жылдары инфляция деңгейі 6-8 пайыз аралығында болады», - деп түйіндеді Премьер-Министр.