Үкімет пен әкімдер дағдарыс кезіндегі менеджерлер ретінде өзін көрсете алмады – Президент
«Қалай десек те әкімдер мен министрлер мүлдем басқа жағдайда жұмыс істеуге дағдыланып қалған. Мұнай бағасы 100 доллар болған кезде, әдемі бағдарламалар жасалды, министрліктер мен әкімдіктер болсын - бюджеттері жақсы болды. Көптеген түрлі имидждік шаралар ұйымдастырылды», - деді Қасым-Жомарт Тоқаев коронавирус инфекциясының таралуына қарсы күрес мәселелері бойынша селекторлық отырысында.
Президент әкімдер мен министрлер тұсаукесерлерде, түрлі форумдарда Қазақстанның жетістіктері туралы әңгімелерді айтуды қатты ұнататынын да еске салды.
«Өмір сүру тәсілінің өзі былай болды: жылына екі демалыс - біреуі қыста, екіншісі – жазда. Осының бәрі мемлекеттік аппаратты біршама босаңсытып, төтенше жағдайда, дағдарыс жағдайында жұмыс істеуге қауқарсыз қылып тастаған. Барлық орындаушылар - мейлі ол Үкімет болсын, әкімдер болсын дағдарыс кезіндегі менеджерлер ретінде өзін көрсете алмады», - деді ол.