ҰҚК Шымкенттегі Тұран ауданының бас санитар дәрігерінің ұсталғаны туралы ақпаратқа түсінік берді
ШЫМКЕНТ. KAZINFORM – Әлеуметтік желілерде Шымкент қаласы Тұран ауданы санитариялық-эпидемиологиялық бақылау басқармасының басшысы Мұрат Бейсенбаевтың ұсталғаны туралы ақпарат тарады. Ұлттық қауіпсіздік комитеті сотқа дейінгі тергеу жүргізіліп жатқанын растады.
Желіде тараған мәліметтерге қарағанда, шенеунік қарамағындағы қызметкерлер арқылы оң санитариялық қорытынды беру үшін пара алып келген деген күдікке ілінген.
Kazinform редакциясы ҰҚК-ге Мұрат Бейсенбаевтың ұсталғаны туралы ақпаратты, қылмыстық іс Қылмыстық кодекстің қай бабы бойынша тергеліп жатқанын, оның процестік мәртебесін және оған қатысты бұлтартпау шарасы таңдалғанын нақтылау туралы сауал жолдады. Сондай-ақ іс бойынша басқа да тұлғалардың бар-жоғын және материалдарда заңсыз сыйақының қандай сомасы көрсетілуі мүмкін екенін сұрады.
ҰҚК тек сотқа дейінгі тергеу жүргізіліп жатқанын растады.
– Қазақстан Республикасы Ұлттық қауіпсіздік комитеті сіздердің сауалдарыңызды қарады. Сотқа дейінгі тергеу жүргізіліп жатқанын хабарлаймыз. Өзге ақпарат Қылмыстық-процестік кодекстің 201-бабының 1-бөлігіне сәйкес жария етуге жатпайды, – деп хабарлады бөлімше бастығы О. Бектенов.
Ведомствоның ресми сайтындағы мәліметке сәйкес, 56 жастағы Мұрат Бейсенбаев 2023 жылғы мамырдан Тұран ауданының санитариялық-эпидемиологиялық бақылау басқармасын басқарып келеді.
Оның медициналық-профилактикалық және заңгерлік бағыт бойынша екі жоғары білімі бар. Санитариялық-эпидемиологиялық қызмет саласында 20 жылдан астам уақыт жұмыс істеген. Әр жылдары Түркістан облысының Түлкібас және Мақтаарал аудандарындағы санитариялық-эпидемиологиялық бақылау басқармаларын басқарған. Сондай-ақ Түркістан қаласы мен Шымкенттің Еңбекші ауданындағы бейінді ведомстволарға жетекшілік еткен.
Бұған дейін ҰҚК Астана қаласы Полиция департаменті көші-қон қызметі басқармасының бұрынғы бастығы Ербол Махметовтың ұсталғанын хабарлаған болатын.
