Үкімет басшысы машина жасау өндірісін локализациялауды арттыратын келісімдер әзірлеуді тапсырды
АСТАНА. KAZINFORM — Машина жасау өндірісін локализациялауды кезең-кезеңмен арттыруға бағытталған үлгілік келісімдерді әзірлеу қажет. Бұл туралы Үкімет отырысында Премьер-министр Олжас Бектенов айтты.
— Бизнес мемлекетаралық өткізу бекеттерінде жүктердің тұрып қалу проблемасымен кезігіп отыр. Көлік, Қаржы министрліктері Ұлттық қауіпсіздік комитетінің Шекара қызметімен бірлесіп, шекарада жедел әрі сапалы мемлекеттік қызмет көрсету жөнінде шаралар қабылдауы қажет, — деді Олжас Бектенов.
Үкімет басшысының дерегінше, 2028 жылы жолаушылар вагондарының паркі 3 мыңнан асады. Бұл тозығы жеткен вагондарға қатысты мәселені шешуге мүмкіндік береді.
— Алайда жеке тасымалдаушылар өз вагондарын жаңартуда қиындықтарға тап болып отыр. Осы мақсатта Көлік министрлігі жеке тасымалдаушыларды қолдау шараларын әзірлеуі тиіс. Бұл жалпы жолаушылар және жүк тасымалының сапасына оң әсер етеді, — деді Премьер-министр.
Сондай-ақ Олжас Бектенов Өнеркәсіп және Көлік министрліктеріне кәсіпорындарды ұзақмерзімді келісімшарттармен қамтамасыз ете отырып, машина жасау өндірісін локализациялауды кезең-кезеңмен арттыруға бағытталған үлгілік келісімдерді әзірлеуді тапсырды.
Айта кетейік Олжас Бектенов темір жол жобаларын уақытылы пайдалануға беру қажеттігін ескертті. Сонымен қатар жасанды интеллект технологияларын теміржолға да енгізу керектігін айтты.
