Үкімет «Бәйтерек» холдингінің капиталын 1 трлн теңгеге ұлғайтады

АСТАНА. KAZINFORM – Биыл Үкімет «Бәйтерек» холдингінің экономикалық жобаларға құятын капитал көлемін арттырды.

— Биыл және одан кейінгі жылдары экономикалық өсудің қарқынын ұлғайту үшін Үкімет экономиканың нақты секторын қаржыландыруды едәуір ұлғайтады. Атап айтқанда, Үкімет «Бәйтерек» холдингінің капиталын 2025 жылы 1 трлн теңгеге ұлғайтады. Бұл шара холдингке 8 трлн теңге сомасына жобаларды қаржыландыруға мүмкіндік береді, — деді Серік Жұманғарин Үкімет отырысында. 

Оның айтуынша, аталған инвестиция елімізде жаңа жобаларды қолға алуға бағытталады. 

— Нәтижесінде өңдеу өнеркәсібінің өндіріс қуаты ұлғайып, өнімділігі жоғары жаңа жұмыс орындары құрылады. Бизнесті қолдау үшін «Бәйтерек» тарапынан қаржыландыру көлемін ұлғайтумен қатар, қаржыландырудың жаңа құралдары енгізіледі, — дейді ол.

Бұған дейін хабарлағанымыздай елімізде бизнес кредитке кепілдік беретін бірнеше қор құрылады. 

Айта кетейік, биыл елімізде рекордтық көлемде тұрғын үй пайдалануға берілмек.