ҰҚШҰ тиімді және сұранысқа ие халықаралық құрылым ретінде әрекет етеді – Президент
АСТАНА. KAZINFORM – ҰҚШҰ ұжымдық қауіпсіздікті қамтамасыз етуге бағытталған тиімді және сұранысқа ие халықаралық құрылым ретінде әрекет етеді. Бұл туралы ҰҚШҰ Ұжымдық қауіпсіздік кеңесі кезекті сессиясының кеңейтілген құрамдағы отырысында Мемлекет басшысы Қасым-Жомарт Тоқаев айтты.
«Бүгінде ҰҚШҰ ұжымдық қауіпсіздікті қамтамасыз етуге бағытталған тиімді және сұранысқа ие халықаралық құрылым ретінде әрекет етеді. Оның даму жылдары ішінде мүше мемлекеттер кең ауқымды мәселелер бойынша өзара іс-қимылдың бай тәжірибесін жинақтады. Ауқымды нормативтік-құқықтық база қалыптастырылды. Қазіргі заманғы сын-қатерлер мен қауіппен күресудің қажетті тетіктері жолға қойылған. Ұжымдық қауіпсіздік күштері мен құралдары құрылды және жұмыс істейді», - деді Президент.
Мемлекет басшысының атап өтуінше, бірқатар беделді, халықаралық және өңірлік ұйымдармен сындарлы ынтымақтастық орнатылды.
«2022 жылы ҰҚШҰ аясында біз ТМД-мен және ШЫҰ-мен ынтымақтастықты нығайту туралы шешім қабылдадық. Қалыптасқан игі дәстүр рухында бүгінгі отырысқа осы халықаралық ұйымдардың басшылары қатысып отыр», - деді Қасым-Жомарт Тоқаев.
