Ұлыбритания семіздікпен күресуге арналған дәріні сынақтан өткізеді
ЛОНДОН. KAZINFORM - Біріккен Корольдік семіздікке шалдыққан науқастардың жұмысқа қайта оралуына көмектесу үшін салмақ азайтуға арналған дәріні сынақтан өткізуге дайындалып жатыр, деп хабарлайды Kazinform тілшісі.
Ұлыбританияның денсаулық сақтау министрі Уэс Стритинг қант диабеті ауруын емдейтін және салмақ жоғалтуға көмектесетін Eli Lilly компаниясы шығарған инъекциялық Mounjaro препаратын сынақтан өткізу жоспарын жариялады.
Бұған дейін де Mounjaro жақсы нәтижелер көрсетті. Жақында JAMA Internal Medicine журналында жарияланған зерттеуге сәйкес бұл дәрінің даниялық Novo Nordisk фармацевтикалық компаниясы шығарған Ozempic және Wegovy сияқты бәсекелес препараттармен салыстырғанда тиімдірек екендігі анықталды.
Стритинг семіздіктің экономикалық және медициналық тұрғыда үлкен шығындар әкелетінін атап өтіп, осы дертке шалдыққан науқастардың жыл сайын төрт күн жұмысқа шықпайтынын алға тартты. Нәтижесінде Ұлттық денсаулық сақтау жүйесіне жылына 11 миллиард фунт стерлинг қаржылық шығын келеді.
Ұлыбритания үкіметі салауатты өмір салты дағдыларын қалыптастыруға да ерекше мән беруде. Мысалы, балаларға арналған зиянды тағамдарды жарнамалауға тыйым салып отыр.
Үкіметтің 2023 жылғы мәліметтеріне сәйкес, ересектердің төрттен бірінен астамы семіздікпен ауырған. Дүниежүзілік денсаулық сақтау ұйымының 2022 жылғы есебінде Ұлыбритания семіздік деңгейі бойынша Еуропада Мальтадан кейін екінші орында тұр деп жазылған.
