Ұлыбритания Сыртқы істер министрі Газа секторы бойынша келіссөздер жүргізу үшін Сауд Арабиясына келді
Ұлыбритания Сыртқы істер министрі Джеймс Клеверли Палестина-Израиль жанжалының өршуіне жол бермеу мақсатында Таяу Шығыс елдеріндегі әріптестерімен келіссөздер жүргізу үшін Сауд Арабиясына келді, деп хабарлайды Kazinform тілшісі.
«Джеймс Клеверли сенбі күні Газа секторындағы жағдай бойынша Араб Лигасының төтенше отырысының алдында Сауд Арабиясында кездесіп жатқан Таяу Шығыс елдерінің сыртқы істер министрлерімен кездеседі», - деп хабарлады Ұлыбритания Сыртқы істер министрлігі.
Джеймс Клеверли онда Ливан мен Йеменді қоса алғанда, аймақтық шиеленістің алдын алуға күш салу мәселесін көтермекші. Ол сондай-ақ Газа секторындағы бейбіт тұрғындарға гуманитарлық көмек көлемін арттыру жөніндегі бастамаларды талқылайды.
«Ол Ұлыбритания көмек жеткізу және кепілге алынғандарды, оның ішінде британдық азаматтарды босату мүмкіндігін беру үшін соғыс қимылдарына ертерек гуманитарлық үзіліс енгізуді жақтайтынын растайды», - деді Ұлыбританияның сыртқы саясат ведомствосы.
«Әріптестік кездесу барысында британдық сыртқы істер министрі Ұлыбританияның қоныс аударушылар зорлық-зомбылығының артуын айыптайтынын растап, Израильді Батыс жағалаудағы жағдайды жақсарту үшін кінәлілерді жауапқа тартуға шақырады. Ол Ұлыбританияның екі мемлекеттің қатар өмір сүруі негізінде өміршең шешімге қол жеткізуге бағытталған дипломатиялық шешімді жандандыруды қолдайтынын мәлімдейді», - деп толықтырды Ұлыбритания СІМ.
