Ұлыбритания Украинадағы бітімгершілік миссиясына қатысатын еріктілер іздейді
АСТАНА.KAZINFORM - Ұлыбритания бітімгершілік келісімге қол жеткізілген жағдайда Украинаға қолдау көрсететін «ниеттілер коалициясын» құрып жатыр, бірақ барлық елдер әскер жіберуге дайын емес, деп хабарлайды Kazinform тілшісі.
Сенбі, 15 наурызда Ұлыбритания премьер-министрі Кир Стармер Ресей мен Украина арасындағы қақтығысты бейбіт жолмен шешуге көмектесуге дайын елдердің басшыларымен онлайн кездесу өткізеді. Ол бітімгершілік миссиясы туралы белсенді пікірталас аясында өтеді.
Стармер «ниеттілер коалициясына» негізінен Еуропа елдері мен Ұлттар Достастығы мүшелерін, Ұлыбритания мен оның бұрынғы колонияларын қамтитын мемлекеттер тобын жинап жатыр.
Қатысушылардың түпкілікті тізімі әлі анықталған жоқ, бірақ британ билігінің мәліметінше, 20-ға жуық мемлекет соғыс қимылдары тоқтатылған жағдайда Украинаға қолдау көрсету нұсқаларын талқылап жатыр.
Бұған дейін Ұлыбритания мен Франция бітімгершілік келісімнің орындалуын бақылау үшін Украинаға әскер жіберуге дайын екендіктерін мәлімдеген. Бұл күштерге қалалар мен стратегиялық маңызды нысандардың, соның ішінде электр станцияларының қауіпсіздігін қамтамасыз ету міндеті жүктеледі, деп жазады Financial Times газеті.
Алайда, «ниеттілер коалициясының» барлық мүшелері өз әскерін жіберуге келісе бермейді. Мысалы, Польша логистикалық қолдау көрсетуге дайын екенін білдірді, ал басқа елдер көмек форматын әлі шешкен жоқ. Көптеген елдер ресми бейбіт келісімге қол қоюды және АҚШ-тың жауабын күтіп отыр.
Стармер бітімгершілік келісімінің шарттарын орындау бойынша әскери миссияның табысты болуы Америка Құрама Штаттарының қолдауына, соның ішінде әуе қорғанысы мен барлау мониторингіне байланысты екеніне сенімді. Алайда президент Дональд Трамп бұл идеяны қолдамады.
Трамп сонымен бірге соғысты тоқтатуды талап етіп, Киевке әскери көмек пен ақпарат алмасуды тоқтатуға қысым жасады. Бұған жауап ретінде Ұлыбритания мен Франция Вашингтонға ұсынылуы мүмкін бейбітшілік жоспарын әзірлеуге тырысып жатыр.
Бұған дейін Ресей сыртқы істер министрі Сергей Лавров НАТО әскерлерінің Украинаға кіру мүмкіндігіне алаңдаушылық білдіріп, мұны альянстың қақтығысқа тікелей араласуы ретінде қабылдауға болатынын атап өтті, деп жазады ТАСС.
Бұған дейін Сауд Арабиясында Украина-Америка келіссөздері өтіп жатқаны, оның барысында Украина АҚШ-қа Ресеймен ішінара атысты тоқтату жоспарын ұсынатыны хабарланған болатын.
