Ұлыбритания: Жаңа үкімет — ескі проблемалар

ЛОНДОН. KAZINFORM — Ұлыбританияның жаңа премьер-министрі заңсыз мигранттарды Руандаға жібермейтін болды. Кир Стармер миллиондаған стерлинг фунты жұмсалған, бірақ жүзеге аспаған жоспардан бас тартып отыр. Оның орнына үкімет басшысы жаңа шекаралық бақылау қызметін құрмақ. Бірақ бұл бастама баспана сұрап, бас сауғалаған босқындарға тосқауыл бола ала ма?

Баспана сұраушыларды Руандаға жеткізуі тиіс алғашқы рейс екі жыл бұрын ұшуы керек-ті. Бірақ Адам құқықтары жөніндегі Еуропалық сот пен Ұлыбританияның Жоғарғы соты халықаралық заңдарға қайшы деп бастаманы бұғаттап тастады.

Консерваторлар заңды айналып өтудің жолын тапқанымен, сайлауда жеңіліп, жоспарларын жүзеге асыра алмай қалды. Жаңа премьер-министр, бұған дейін өзі уәде еткендей, депортациялау бағдарламасын тоқтатты.

«Қараңыз, Руанда жоспары жүзеге аспай тұрып, оның тиімсіз екені белгілі болды. Ол заңсыз көші-қонды тежеген емес және тежемейді де. Осы жылдың алғашқы алты айында Британияға келген босқындардың саны көп және рекордтық деңгейге жетіп отыр», -дейді Ұлыбританияның премьер-министрі Кир Стармер.

Стармер басшылық ететін үкімет мәселені шешу үшін босқындарды заңсыз тасымалдаумен айналысатын қылмыстық топтарға жіті назар аудармақ.

Ол үшін полиция, ішкі барлау басқармасы және прокуратура қызметкерлері Ұлыбританияда жұмыс істейтін халықаралық агенттіктермен бірігіп, шекара қауіпсіздігінің қолбасшылығы құрылады.

Ал консерваторлардың жобаға жұмсаған 300 миллион фунттан астам қаражаты мұқият зерттеледі.

«Мен қаражаттың тиімді жұмсалуын, заңнаманың орындалуын жіті тексеріп, аудит жүргіземін. Және нәтижесі туралы парламент алдында есеп беремін. Шекараларымыздың қауіпсіздігін нығайтуға бөлінген ақшаның дұрыс пайдаланылғанына көз жеткізуіміз керек», -дейді Ұлыбританияның ішкі істер министрі Иветт Купер.

Руанда Британ үкіметінің сұраныстарын толық қанағаттандырғанын және ақшаны түгел жұмсап тастағанын айтты.

«Мигранттарды уақытша орналастыру үшін баспана дайындалып, тіпті босқындарға арналған үйлердің құрылысы басталып кетті. Қол қойылған келісім-шартта жоспар сәтсіздікке ұшыраса, ақша қайтарылады деп айтылмаған, ” дейді африкалық шенеуніктер.

«Шындығында, келісімді Руанда емес, Ұлыбритания үкіметі бұзды. Бұл қаражат елімізге берілген несие емес. Нақты әрекеттерді жүзеге асыру үшін Руандаға жіберілген ақша болды. Міндеттемелерімізді орындадық. Қаражатты қайтаруға ешқандай негіз жоқ», -дейді Руанда үкіметі ресми өкілінің орынбасары Ален Мукуралинда.

Заңсыз көші-қон өзекті тақырып болғандықтан, жаңа үкіметке қарсы қысым күшейді. Сондықтан Лейбористер қалай болғанда да шағын қайықтармен Ла-Маншты кесіп өтетін ондаған мың адамға тосқауыл қоюы керек.

Руанда заңының негізгі авторы және Ұлыбритания Ішкі істер министрлігінің бұрынғы басшысы лейбористердің ұсынысына наразылығын білдірді.

Айтпақшы, Суэлла Браверман Тори көшбасшылығына үміткерлердің қатарында, өйткені Риши Сунак қызметінен кетуді жоспарлап отыр.

«Жылдар бойы жасалған қажырлы еңбек, парламенттік актілер және миллиондаған стерлинг фунты зая кеткендей. Жоба сәтті жүзеге асқанда өз жемісін берер еді. Бірақ, сіз білесіз бе, бізді енді көп кедергі күтіп тұр. Консервативтік партия бұған қарсы әрекет етуі керек», — дейді Ұлыбританияның бұрынғы Ішкі істер министрі Суэлла Браверман.

Жыл басынан бері 13 500-ден астам адам басын қауіп-қатерге тігіп, Британ жағалауына үрлемелі қайықпен жүзіп келген.

Бірақ қазір қатты жел тұрып, теңіз мазасынданған соң олардың саны азайып тұр.

Шенеуніктер мұның ұзаққа созылмайтынын жақсы түсінеді. Өйткені Францияда шекараны кесіп өткісі келіп, елеңдеумен тұрғандар көп.

Сұраныс болғандықтан көші-қон дағдарысы жақын арада шешімін табады деп айту қиын.